Reisskandaal: LP’s se skuld afgeskryf
2011-08-31 07:02
Kaapstad. – Die parlement het R12 miljoen afgeskryf wat nie gevorder kan word nie van LP’s wat met die reisskandaal verbind word.
Max Sisulu, speaker van die Nasionale Vergadering, het verlede week in ’n brief aan Ian Davidson, hoofsweep van die DA, geskryf die parlement beskou die sage nou as afgehandel. Volgens hom is dit onmoontlik om die geld te verhaal.
Tot dusver is net ses van die 79 LP’s wie se name op ’n lys van moontlike “betrokkenes” by die misbruik van reiskoepons verskyn, strafregtelik vervolg.
Die parlement het egter geen planne om die 73 ander te vervolg nie.
“Dit is wyd bekend dat Bathong Travel sy rekords vernietig en die skedule (waarop die LP’s se name verskyn) hersaamgestel het.
“Daar kan dus geen lig gewerp word op die vraag of die lede wat daarin gelys word wel by enige verkeerde optrede betrokke was nie.
“En aangesien daar geen verdere bewyse is nie, is dit onmoontlik om teen enige van die lede op te tree,” het Sisulu geskryf.
Die parlement het die eise teen bepaalde LP’s vir R370 000 by Bathong Travel se likwidateurs oorgekoop.
Die DA is ontevrede met dié besluit.
“Ons kan nie hierdie massa-borgtog vir LP’s wie se gedrag onwettig en moreel verkeerd was, onderskryf nie,” het Davidson gesê.
Hy beoog om aan Ben Turok, voorsitter van die parlement se etiekkomitee, te skryf om te versoek dat ’n ondersoek na die betrokke LP’s ingestel word.
“LP’s wat bedrog teen die parlement gepleeg en sy integriteit ondermyn het, moet ondersoek en verantwoordbaar gehou word.”
Die lys sluit Maggie Sotyu, adjunkminister van polisie, in.
Sy het ná die bekendmaking van die lys vroeër vandeesmaand gesê sy skuld Bathong Travel niks, in weerwil daarvan dat sy luidens die skedule sowat R70 000 se onbetaalde eise teen haar het.
– Volg Nuus24 op Twitter
- Die Burger