Reis-eise: DA gereed om tugverhoor te begin
2011-08-16 09:04
Kaapstad – Die DA het reeds ’n klagstaat opgetrek en is slaggereed om met die tugverhoor teen dr. Manie van Dyk, DA-LP, oor sy reis-eise te begin.
Al wat nog kort, is ’n verklaring van ’n lid van die publiek rondom klagte dat Van Dyk ook vir reise van sy meerderjarige dogter, Wanya Downing, van die parlement geëis het.
Hendrik Schmidt, DA-LP en voorsitter van die party se federale regskommissie, het by navraag gesê die DA het reeds dié mens versoek om die verklaring af te lê.
“Ons is heeltemal in die hande van die lid van die publiek. Sodra ons dit het, kan ons die klagstaat aan Van Dyk beteken.”
Schmidt wou nie sê wie die mens is nie.
Schmidt het toegegee dat die regskommissie nie onbepaald vir die verklaring kan wag nie.
“As ons dit nie kry nie, val een van die aanklagte teen dr. Van Dyk weg.”
Ofskoon hy hom nie wou uitlaat oor die aantal klagte teen Van Dyk nie, het hy wel bevestig daar is beslis nie net een nie.
In September verlede jaar is onthul dat Van Dyk padreis-eise van R275 500 vir die boekjaar 2009-’10 by die parlement ingedien het.
Vir ’n rit padlangs tussen Kaapstad en Johannesburg kon LP’s ’n eis van byna R12 000 indien, terwyl ’n retoer-vliegkaartjie die parlement tussen R5 000 en R6 000 sou kos.
Ná die eerste ondersoek teen Van Dyk het James Selfe, voorsitter van die DA se federale uitvoerende komitee, in Junie aangedui ’n subkomitee het bevind dat nie die parlement, of die DA ’n etiese kode vir die gebruik van reis- en ander voordele het nie. Daar kon dus nie teen Van Dyk opgetree word nie.
’n Paar dae later is onthul ’n deel van Van Dyk se eise in 2009 was vir naweekreise deur sy volwasse dogter en haar destydse verloofde, Reinhardt Downing.
Dit het ook aan die lig gekom dat Van Dyk nooit die klagte ingedien het nie waarmee hy in Junie gedreig het nadat Natasha Michael, DA-LP en adjunkvoorsitter van die DA se federale raad, gevra is om verder ondersoek in te stel.
Van Dyk het beweer sy het nie ’n mandaat gehad om dit te doen nie en het beweer sy is “kwaadwillig” en smeer sy naam swart.
Michael het Maandag gesê geen klagte is teen haar ingedien nie.
Van Dyk het Maandagaand gesê hy weet nie hoe ver die ondersoek teen hom is nie.
Volg Nuus24 op Twitter.
- Volksblad