Reinigingseremonie begin by eeufees
2012-01-06 22:53
Bloemfontein – Tradisionele- en geloofsleiers het Vrydagaand met die reinigingseremonie van die ANC se eeufeesvieringe buite die Waaihoek Wesleyaanse Kerk in Bloemfontein begin.
Die diens, wat bestaan het uit boodskappe en seënwense van verteenwoordigers van die Christelike, Moslem, Rastafariese en tradisionele Afrika-gelowe, is in ‘n markiestent buite die kerk gehou waar die die ANC in 1912 gevorm is.
Onder diegene wat die diens bygewoon het, was die ANC se sekretaris-generaal, Gwede Mantashe, die ANC se hoofsweep, Mathole Motsheka, die party se voorsitter, Baleka Mbete en die minister van korrektiewe dienste, Nosiviwe Noluthandu Mapisa-Nqakula.
Die LUR vir openbare werke in die Vrystaat, Elisa Mabe, het namens die premier van die Vrystaat, Ace Magashule, met die skare gepraat.
Mabe het gesê die provinsie is oop vir almal wat die vieringe wil bywoon.
“Ons hoop dat God die aktiwiteite sal seën en almal van julle is baie welkom om saam met ons te wees by al die programme. Al wat ons wil doen, is om welkom te sê.”
‘n Nagwaak is geskeduleer om buite die kerk gehou te word en die diens sal oorloop in ‘n reinigingseremonie teen sonsopkoms Saterdag.
– Volg Nuus24 op Twitter
- SAPA