Regters vat Lotto-raad vas
2011-09-30 09:11
Kaapstad – Die Lotto-raad hou openbare geld in sy besit om aan verdienstelike gevalle toe te ken. Die geld behoort nie aan die Lotto-raad om soos hy wil as “geskenke” uit te deel nie.
Só het vyf appèlregters Donderdag in ’n kwaai teregwysing aan die Nasionale Loteryraad (NLR) gesê nadat twee welsynorganisasies se aansoeke om Lotto-hulp oor beuselagtighede afgewys is.
Die South African Education and Environment Project werk veral in die Philippi-gebied in die Wes-Kaap en help om arm kleuterskole en skole in die gebied aan die gang te hou.
Die Claremont Methodist Church Social Impact Ministry, in die wandel bekend as die Sikhula Sonke-organisasie, help 4 000 arm voorskoolse kinders in die woonbuurt Khayelitsha om basiese opleiding te kry.
Albei se aansoeke om geldelike hulp aan die NLR is oor suiwer tegniese probleme afgewys “wat met ’n foonoproep reggestel kon gewees het”.
Appèlregters F. Brand, B. van Heerden, A. Cachalia, J. Shongwe en W. Seriti het bevind die redes wat die NLR vir sy afkeuring aanwys is beuselagtig.
Hulle het daarop gewys dat die NLR volgens die jongste syfers met sowat R6 miljard sit wat aan verdienstelike instellings toegeken moet word, maar dat dit doodeenvoudig nie gedoen word nie.
Die NLR moet nou verstaan dat hy ’n staatsinstelling is wat deur die Loterywet geskep is, het hulle bygevoeg.
Volg Nuus24 op Twitter.
- Die Burger