Regter-weduwee glo nie gesond
2010-03-30 08:24
Kaapstad - 'n Bekende Johannesburgse advokaat, adv. Kenny Oldwadge, het Maandag vir Thandi Maqubela (55), weduwee van waarnemende regter Patrick Ntobeko Maqubela (61), verskyn.
Maqubela het vir die eerste keer saam met Vela Mabena (45) in die Kaapstadse landdroshof verskyn op aanklag van moord op haar man.
Maqubela is Donderdagoggend deur supt. Jo-ash Dryden en supt. Reynold Talmakkies by haar huis in Sandton, Johannesburg, in hegtenis geneem.
Mabena is dieselfde aand op die perseel van die Franse konsulaat in Nuweland, Kaapstad, in hegtenis geneem waar hy en sy vrou, Vicky Mabena, ’n huishoudster, woon.
Oldwadge het vir landdros Vusi Mhlangu gesê sy kliënt gaan Donderdag om borgtog aansoek doen. Sy vra ook toegang tot die polisiedossier, veral tot ’n verklaring wat sy tydens die polisie-ondersoek gemaak het.
Oldwadge het gesê Talmakkies het gesê hulle moet ’n aansoek by die hof indien om die verklaring te kry.
Adv. Bonnie Currie-Gamwo, vir die staat, het gesê hulle is die naweek ingelig dat Maqubela gesondheidsprobleme ondervind.
Maqubela word by die Seepunt-polisiekantoor aangehou.
Dis daar makliker vir ’n dokter om haar te besoek en vir die ondersoekbeampte om toesig te hou.
Zaheer Karjiker, regsverteenwoordiger vir Mabena, het gesê hy gaan ook Donderdag om borgtog aansoek doen. Mabena word by die Claremont-polisiekantoor aangehou.
Regter Maqubela se lyk is op Sondag 7 Junie verlede jaar in sy luukse woonstel in Seepunt gevind. Hy was toegemaak onder ’n kombers met ’n bloedbesmeerde kussing wat skuins oor sy kop gelê het.
Die saak is tot Donderdag uitgestel vir die borgtogaansoeke.
Oldwadge het Lolly Jackson, eienaar van die ontkleeklub Teazers, in 2008 verteenwoordig.
- Die Burger