Regter moet besluit wie lieg: Selebi of Agliotti
2010-07-02 06:21
Johannesburg - Die geloofwaardigheid en betroubaarheid van die twee hooffigure in die korrupsieverhoor van Jackie Selebi – die oudpolisiehoof self en die hoofstaatsgetuie, Glenn Agliotti – is die belangrikste aspekte in sy taak om ’n bevinding te maak.
Só het regter Meyer Joffe Donderdag in ’n volgepakte hofsaal in die Suid-Gautengse hooggeregshof hier gesê voordat hy die afhandeling van sy uitspraak in die agt maande lange verhoor tot vanoggend uitgestel het.
Advokate vir die staat en die verdediging het mekaar se hooffigure in die verhoor oor en weer van leuens beskuldig.
“Agliotti is die slegste getuie ooit,” het adv. Jaap Cilliers SC, Selebi se regsverteenwoordiger, gesê.
“Selebi is die mees leuenagtige getuie wat daar is,” het adv. Gerrie Nel, vir die staat, gesê.
Die staat het 17 getuies geroep en die verdediging ses.
Waar die hof met leuenagtige getuies te doen het, is die ondersteunende getuienis van ander getuies belangrik, het die staat vroeër aangevoer.
Joffe het Donderdag gesê in hierdie saak het Selebi se verdediging net twee getuies se geloofwaardigheid aangeval: Agliotti en sy gewese verloofde, Dianne Muller.
“Dit bly steeds die staat se plig om hul saak bo alle redelike twyfel te bewys,” het Joffe gesê.
Hy het sy opsomming van al die gebeure en getuienis teen die spoed van die Gautrein van presies 09:15 die oggend tot 13:30 die middag voorgelees, met net ’n kort verdaging om sy hees stem weer reg te kry.
Joffe het daarna rustiger voortgegaan. Hy het die dag se verrigtinge verdaag net voordat hy met die betekenisvolle deel van sy uitspraak begin het.
Joffe het wel bevind die video waarin komm. Mulangi Mphego, gewese hoof van misdaadintelligensie in die polisie, ’n “van die rekord”-onderhoud met Agliotti voer, mag wel as getuienis toegelaat word.
In die video ontken Agliotti dat hy ooit geld aan Selebi gegee het. In die hof het hy getuig hy het sowat R1,2 miljoen aan Selebi betaal en vir hom verskeie presente gekoop terwyl hy Suid-Afrika se polisiehoof en die hoof van Interpol was.
Selebi word ook van regsverydeling aangekla.
- Die Burger