Regter in nek geskiet
2010-01-07 06:39
Philip de Bruin
Johannesburg - ’n Waarnemende regter van die hooggeregshof in Pretoria het die dood net-net vrygespring toe hy in sy huis deur ’n inbreker in die nek geskiet is.
Die koeël uit die vuurwapen van die booswig het regter Mahomed Ismail se nek binnegedring, sy strottehoof en nekslagaar “met millimeters” gemis, dwarsdeur sy nek getrek en agter uitgekom.
Die aanval was Maandag in die vroeë oggendure in die regter se huis in Emmarentialaan in Parkview, Johannesburg.
“My vrou was reeds in die huis doenig en ek het van haar gille wakker geword.
“Ek het opgestaan en na haar gestap. Ek het ’n gewapende inbreker teëgekom, in ’n kamer gespring en wou die deur toemaak en sluit.
“In die proses wat ek die deur toegemaak het, het hy geskiet en my getref.
“Ek kon die deur toemaak en hulp ontbied. Die inbrekers, daar was meer as een, het toe met leë hande gevlug.
“Dit was ’n baie skoon ingangs- en uitgangswond, maar dit het verskriklik gebloei.
“Ek is hospitaal toe gebring waar een van die dokters wat my behandel het aan my gesê het: ‘Jy kan jou sterre dank dat jy nog leef.’
“Klaarblyklik het die koeël my strottehoof en die nekslagaar net-net gemis,” sê Ismail.
Hy is Dinsdag ontslaan.
“My vrou en ek is uiteraard erg getraumatiseer, maar hopelik sal ek by die aanvang van die hofverrigtinge ná die reses sterk genoeg wees om te gaan werk.”
- Beeld