Regter Motata wéér in ’n botsing betrokke
2011-07-03 06:40
Johannesburg - Regter Nkola Motata was Saterdag weer met sy blou Jaguar in ’n botsing betrokke. Dié keer in die Johannesburgse middestad.
Die ongeluk het omstreeks 07:30 in Berthastraat, Braamfontein, gebeur.
Volgens insp. Wayne Minnaar, woordvoerder van die metropolisie, was Motata se motor en ’n taxi in die botsing betrokke. Hy kon nie sê of enigiemand seergekry het nie.
Toe hy gevra is of drank ’n rol gespeel het, het Minnaar gesê Motata was nugter.
Hy het ook nie geweet hoekom daar metropolisiebeamptes op die toneel van dié botsing tussen ligte voertuie was nie.
Motata is in 2009 skuldig bevind aan dronkbestuur nadat hy in 2007 met sy Jaguar in ’n muur in Hurlingham, Johannesburg, vasgery het.
Hy is tot 12 maande tronkstraf of ’n boete van R20000 gevonnis.
Sapa berig die Regterlike Dienskommissie het die afgelope week besluit om ’n tribunaal aan te stel nadat AfriForum gekla het oor ’n rassistiese aanmerking wat Motata tydens dié voorval gemaak het.
AfriForum het gekla omdat Motata na bewering op die aand van sy ongeluk in 2007 aan mnr. Richard Baird, eienaar van die erf waarop dit gebeur het, gesê het: “Dit was eers ’n wit man se land hierdie, maar is nie meer nie.”
- Rapport