Regstappe dalk oor affair
2011-09-03 09:17
Bloemfontein – Regstappe word beoog teen die rektor van die Sentrale Universiteit vir Tegnologie (SUT) in Bloemfontein oor ’n beweerde verhouding met ’n getroude werknemer van die universiteit.
Prof. Thandwa Mthembu, vise-kanselier en rektor van die SUT, is in ’n beweerde romantiese verhouding betrokke met Geralda Winkler, die nuwe bestuurder van projekte en geldinsameling aan die SUT.
Winkler se man, Clement, het bevestig hy oorweeg regstappe teen Mthembu, maar wou op advies van sy regsverteenwoordiger, Rudolf Britz van Honey-Prokureurs, nie verder kommentaar lewer nie.
Die man en sy vrou is na verneem word in die proses om te skei.
Dan Maritz, woordvoerder van die SUT, het nie ’n vraag van Volksblad oor die beweerde buite-egtelike verhouding beantwoord nie.
Personeellede van die SUT, wat verkies om anoniem te bly, noem in ’n lang lys van klagtes oor die rektor dat Winkler skielik bevorder is. Volgens hulle is sy en Mthembu gedurig op sake-uitstappies regoor Suid-Afrika en oorsee.
Mthembu, Winkler en Nonkululeko Mthembu, die rektor se dogter, se reis na Amerika van 14 tot 26 Junie het ook heelwat wenkbroue laat lig.
Ná verneem word, het die drie se vliegtuigkaartjies meer as R180 000 gekos. Dan moet verblyfkoste en dagtoelae ook bygereken word.
Maritz sê ingevolge die SUT se beleid kon die rektor sy dogter saamvat. Die universiteit het vir haar uitgawes betaal. Winkler is deur die SUT en deur ’n Amerikaanse departement gefinansier.
Die rektor het onder meer die IAUP (International Association of University Presidents) se 16de Triennial-konferensie in New York bygewoon waar hy ook as ’n spreker opgetree het.
Maritz sê Mthembu is aangestel as ’n lid van die IAUP en Verenigde Nasies (VN) se kommissie oor ontwapening, konflikoplossing en vrede. Die rektor is ook ’n lid van die IAUP se uitvoerende komitee.
Volgens Maritz was Winkler toe die waarnemende bestuurder van projekte en geldinsameling.
Sy het die geleentheid gehad om Amerikaanse vise-kanseliers wat al miljoene dollars ingesamel het, te ontmoet en van hulle te leer.
– Volg Nuus24 op Twitter.
- Volksblad