Regsman het planne om Derby-Lewis vry te kry
2012-01-30 07:01
Pretoria – Clive Derby-Lewis, wat onlangs 76 jaar oud geword het, gaan een van twee weë volg in sy jongste poging om uit die Pretoria-Sentraal-gevangenis te kom.
Marius Coertze, sy prokureur, het gesê ’n aansoek om Derby-Lewis op mediese parool vrygelaat te kry, sal ingedien word indien die verslag van ’n chirurg binnekort bekom word.
Die chirurg het hom reeds ondersoek.
As die verslag nie binnekort beskikbaar is nie, sal ’n aansoek by die hooggeregshof in Pretoria ingedien word om die weiering van Derby-Lewis se parool tersyde te laat stel.
So ’n hofaansoek behoort einde Maart of in April aangehoor te word, het hy gesê.
Derby-Lewis het reeds 18 jaar tronkstraf uitgedien nadat hy tot lewenslange tronkstraf gevonnis is weens die moord op Chris Hani, SAKP-leier.
Hy probeer sedert 2007 parool kry.
Nosiviwe Mapisa-Nqakula, minister van korrektiewe dienste, het in Desember by die opening van die galgkamer-museum in Pretoria gesê Derby-Lewis gaan nie vanjaar op parool vrygelaat word nie.
Volgens haar het Derby-Lewis twee jaar gelede in ’n paroolaansoek gesê as hy uit die tronk kom, gaan hy eers rus en daarna alles oor die moord op Hani onthul.
“Hoekom nie nou nie?” wou sy weet.
Coertze het egter gesê: “Dis nonsens. Daar is regtig níks vir my kliënt om te openbaar nie. Alles het uitgekom in die (strafregtelike) verhoor en voor die Waarheid-en-versoeningskommissie.”
Derby-Lewis se vrou, Gaye, het in ’n brief aan die minister gesê haar man het nié gesê hy sal alles onthul sodra hy uit die tronk kom nie.
Sy het die minister ook daarvan beskuldig dat dié voortydig besluit het haar man sal nie vanjaar parool kry nie.
Coertze het gesê as die hersieningsaansoek gebring word, sal daarin na die minister se stellings verwys word.
Volgens hom het Derby-Lewis se velkanker teruggekeer.
Sonwabo Mbananga, woordvoerder van die minister, het by navraag gesê sy gaan nie op mev. Derby-Lewis se brief kommentaar lewer nie.
– Volg Nuus24 op Twitter
- Beeld