Regrukplanne kom vir onderwys
2010-01-08 09:56
Alet Rademeyer
Die daling in die nasionale matriekslaagsyfer van 62,5% na 60,6% is “marginaal, maar terneerdrukkend”.
Sy is teleurgesteld, het slapelose nagte en die departement van basiese onderwys is nie waar hy wil wees nie, het me. Angie Motshekga, minister van dié departement, gister by die bekendmaking van die uitslae in Pretoria gesê.
Sy het aangekondig ’n “sektorale bloudrukplan” gaan voor einde Maart ontwikkel word om die onderwysstelsel om te draai en swak onderrig aan te pak.
Sy het gesê dringende stappe is nodig om die gehalte van onderrig te verbeter met verwysing na skole en onderwysers wat meer en beter ondersteuning en opleiding moet kry, terwyl beter infrastruktuur en tydige lewering van handboeke ook nodig is. “Daar moet direkte ingryping by skole wees en ons gaan kundiges inbring om ons te wys hoe jy stelsels kan versterk.”
Motshekga het gesê sy is teleurgesteld in die uitslae. Net KwaZulu-Natal (61,1%) het verbeter en die Oos-Kaap (51%) het gestabiliseer. Die res het almal swakker gevaar met Gauteng (71,8%), Noordwes (67,5%), Mpumalanga (47,9%) en Limpopo (48,9%).
Aan die positiewe kant het sy uitgewys dat die gehalte van kandidate se “slaag” begin skuif het en dat meer kandidate met 40% en hoër deurgekom het.
Sy het gesê vraestelle het hoër kognitiewe eise aan kandidate gestel en die onverwerkte punte is in die meeste vakke, 41 van 57, behou. “Wat kandidate gekry het, is die werklike prentjie.”
Fisiese wetenskappe was egter ’n uitsondering en prof. John Volmink, voorsitter van Umalusi, het toegegee die inhoud van die kurrikulum is te moeilik vir gr.12’s.
Net 45452 (20,5%) van die 220882 kandidate wat dié vak geneem het, het dit met 40% en hoër geslaag.
Motshekga het gesê dit is ook positief dat meer leerlinge vir wiskunde (296659) as vir wiskundige geletterdheid (284309) geregistreer het.
Motshekga het gesê leerlinge se prestasie in kernvakke soos wiskunde, fisiese wetenskappe en rekeningkunde is egter steeds “kommerwekkend’’.
Altesame 62743 (35,9%) van 174 347 kandidate wat rekeningkunde geskryf het, het bo 40% gekry. In die geval van wiskunde het 85356 (29,3%) van 296659 kandidate dit gekry en in landbouwetenskappe net 19723 (21,8%) van 90136 kandidate.
Terwyl tientalle matrikulante gister gejubel het toe hulle hul uitslae by skole gekry het, was daar ook ’n demper omdat tientalle kandidate in Mpumalanga en Limpopo nie hul uitslae gekry het nie.
AfriForum het gesê die organisasie se jeugkantoor is gister oorval met klagtes van matrikulante wat onder meer verneem het dat hul “eksamennommers nie bestaan nie”.
Mnr. Granville Whittle, onderwyswoordvoerder, het bevestig stelselprobleme is ondervind met die uitslae van onder meer Limpopo en die Oos-Kaap.
’n Probleem met die departement se rekenaarprogram was ook die rede waarom tientalle kandidate se onderskeidings nie in die koerant in hul uitslae korrek aangedui is nie. Die program het net voorsiening vir agt onderskeidings gemaak.
- Beeld