Regering ontsteld oor gru-verkragting

2013-02-07 14:05

Johannesburg – Die regering het in ‘n verklaring sy ontsteltenis uitgespreek oor die tienermeisie wat in Bredasdorp in die Wes-Kaap om die beurt verkrag en toe vermoor is.

“Dit is kommerwekkend dat verkragting en mishandeling die norm geword het. Dit mag nie meer voort duur nie,” het Phumla Williams, waarnemende uitvoerende hoof van die regering se kommunikasie- en inligtingsdiens (GCIS), in die verklaring gesê.

“Die samelewing moet sy denkwyse oor die waardigheid van lewens en respek vir mekaar verander. Diegene wat kinders molesteer en aanrand het nie ‘n plek in ‘n demokratiese Suid-Afrika nie.”

Williams sê dit is belangrik vir die samelewing om te help om misdaad teenoor kinders te bekamp.

Die Burger het vroeër berig dat veiligheidswagte die naweek Anene Booysen (17) in ‘n nywerheidsgebied op die dorp gevind het. Sy is om die beurt verkrag en vermink.

Die tiener is toe na Tygerberg Hospitaal geneem, waar sy ure later gesterf het.

Kapt. FC van Wyk het aan Cape Argus gesê die meisie het een van haar aanvallers se name genoem voordat sy dood is. Jonathan Davids (22), haar ekskêrel, is kort daarna in hegtenis geneem.

‘n Hospitaalbron het aan die koerant gesê haar beserings was te gruwelik om te beskryf.

Davids het vroeër die week in die hof verskyn en sal eersdaags weer sy plek in die beskuldigdebank inneem.

Intussen is ‘n tweede man in verband met die aanval vasgetrek. Hy verskyn binnekort in die hof op aanklagte van moord en verkragting.

Volg Nuus24 op Twitter

- SAPA