Regering wil tekortkominge takel
2012-01-18 09:00
Bela-Bela – Die regering het onafhanklike kenners gevra om vas te stel of hy aan die verwagtinge van die publiek voldoen.
Dié bevindings van die publiek se opvattings sal hier op die regering se jaarlikse lekgotla (bosberaad) bespreek word.
Dit sal die regering help om sy tekortkominge te takel, het Collins Chabane, minister in die presidensie, Dinsdagmiddag op die eerste dag van die beraad by Forever Resorts se vakansieoord gesê.
Die beraad, onder voorsitterskap van pres. Jacob Zuma, duur tot Vrydag. Benewens ministers en adjunkministers is premiers ook teenwoordig.
Die direkteurs-generaal van die staatsdepartemente en verteenwoordigers van plaaslike regerings woon dit as waarnemers by.
Die regering sal op die beraad nie net oor die pad vorentoe vir die volgende jaar besin nie, maar ook terugkyk na sy vertoning die afgelope sowat drie jaar.
“Dit help nie ons luister net na mekaar hier op regeringsvlak nie. Ons glo dit is beter om ook die insette van onafhanklike deskundiges te kry om ons met die evaluering te help,” het Chabane gesê.
Volgens hom verwag die publiek van die regering om voort te bou op sy sterk punte, maar ook daadwerklike stappe te doen op dié gebiede waar hy nie goed vaar nie, of die mense van die land in die steek laat.
Tog het die Zuma-regering sedert sy bewindsoorname in 2009 meestal goed gevaar en wil hy daarop voortbou, het Chabane gesê.
Hy het bygevoeg die kabinet is nie bang om krities na homself te kyk nie wanneer hy besluite neem wat syns insiens die beste vir die land is.
“Die lekgotla is die kabinet se belangrikste strategiese beplanningsessie van die jaar.”
Die grondslag vir Zuma se staatsrede met die opening van die parlement aanstaande maand sal ook die volgende paar dae deurtrap word.
Chabane het gesê daar sal opnuut gekyk word na die regering se prioriteitsgebiede – veiligheid, gesondheid, onderwys, werkskepping en landelike ontwikkeling en grondhervorming – omdat dit die grondslag lê waarmee die land se uitdagings aangepak kan word.
In die lig van die wêreldwye resessie sal daar ook oor die toestand van die Suid-Afrikaanse ekonomie gepraat word.
– Volg Nuus24 op Twitter.
- Die Burger