Regering wil steeds twee stralers huur
2011-11-19 10:01
Kaapstad – Terwyl die regering altesaam R1,6 miljard probeer vind om twee nuwe presidensiële stralers te koop, het me. Lindiwe Sisulu, minister van verdediging, vandeesweek gesê onderhandelings moet voortgaan om ’n bykomende twee luukse stralers teen ’n koste van R820 miljoen oor vyf jaar te huur.
Daar is vroeër berig haar departement het die aanvanklike tender met ’n tweede een vervang sonder om AdoAir, die ontvanger van die aanvanklike tender, daaroor in te lig. AdoAir dagvaar nou die minister en die departement weens kontrakbreuk.
Adv. Pikkie Greeff, nasionale sekretaris van die Suid-Afrikaanse Nasionale Weermagunie (Sanwu), het gesê dit wil voorkom of die minister se kantoor verdagte regsadvies ontvang het. “Dit lyk of die departement eers agterna agtergekom het hul plan om uit die kontrak te loop, was swak regsadvies. Hulle besef nou eers hulle is gebonde aan die oorspronklike tender.” Greeff wonder of die onlangse bedanking van Paul Ngobeni, Sisulu se regsadviseur, aan dié debakel gekoppel is.
Siphiwe Dlamini, departementele woordvoerder, het alle navrae verwys na Barnabas Xulu, die minister en die departement se regsadviseur in die geding teen AdoAir. Xulu het aan Die Burger gesê hy kan nie kommentaar lewer in ’n sub judice-saak nie.
Die warboel waarin die departement hom met luukse stralers bevind, het krisisafmetings aangeneem omdat die Inkwazi-straler van pres. Jacob Zuma van begin September tot einde Desember volgens hofstukke noodsaaklike onderhoudswerk moet ondergaan.
Sisulu se departement en die lugmag is aan die rondskarrel om luukse stralers te bekom om Zuma en ander – wat volgens geheime departementele dokumente ministers, adjunkministers en “militêre veterane” insluit – rond te vlieg, asook om die dreigende regsaksie te probeer afweer.
In Maart vanjaar het die departement die aanvanklike tender van R820 miljoen aan AdoAir vir twee stralers oor vyf jaar toegeken, maar die kontrak nooit onderteken nie. AdoAir het met ’n regsgeding begin en die hof onder meer gevra om Sisulu te dwing om redes te verskaf waarom die tender nie uitgevoer is nie.
AdoAir het aangevoer die departement het van vertragingstaktiek gebruik gemaak en AdoAir later geïgnoreer.
Sisulu se regspan het vandeesweek aan AdoAir gesê sy kan nie redes verskaf vir die onafgehandelde tender nie en dat onderhandelings met AdoAir hervat moet word.
“Ons kliënt is die minister van verdediging en as sy voorstel dat onderhandelings heropen moet word, is sy ernstig,” het Xulu aan AdoAir geskryf.
David Maynier, DA-LP, het gesê die tenderproses wat die regering vir nuwe BBP-vliegtuie volg, laat baie vrae ontstaan.“Ek het Jerome Maake, voorsitter van die staande komitee oor verdediging, gevra om ’n vergadering te reël waar Sisulu ’n verduideliking moet gee van die aanskaffingsprosedure en van die chaos in die lugmag se BBP-eskader.”
– Volg Nuus24 op Twitter
- Die Burger
