Regering ‘vermors meer as R1 miljard'
2010-04-09 09:08
Liesl Peyper, Die Burger
Kaapstad - Die ANC-regering het sedert Julie verlede jaar meer as R1 miljard op “onnodige uitgawes” soos peperduur ampsmotors, hotelverblyf en partytjies vermors.
Met dié geld kon 19 000 laekoste-huise gebou word of dit kon die salarisse van 8 000 ekstra onderwysers betaal het.
Die DA het dié inligting gister op ’n nuuskonferensie bekend gemaak.
Die party hou sedert 26 Julie verlede jaar rekord van alle besteding wat hulle as ’n vermorsing beskou.
Dit sluit luukse ampsmotors en hotelverblyf, asook rojale partytjies, bankette en advertensies in.
Die ANC het ook R22,5 miljoen aan ’n teaterproduksie bestee waarvoor die departement van behuising betaal het.
Die DA se parlementêre leier, mnr. Athol Trollip, het egter daarop gewys dat die totaal van R1 miljard ’n baie konserwatiewe raming is.
Volgens hom is die omstrede kontrakte van R240 miljoen – wat die Limpopo-regering met Julius Malema, leier van die ANC-jeugliga, gesluit het – nie bygereken nie.
Die geld wat dit kos om die nuwe portefeuljes in die presidensie tot stand te bring, is ook nie daarby ingesluit nie.
Trollip het die minister van polisie, mnr. Nathi Mthethwa, en die nasionale polisiehoof, genl. Bheki Cele, as die twee “groot verkwisters” bestempel.
“Hulle is lief vir bling,” het hy gesê met verwysing na Mthethwa se luukse hotelverblyf van R805 000 in die V&A Waterfront en Cele se nuwe ampswoning van R3,3 miljoen, terwyl ’n meer beskeie ampswoning wel beskikbaar was.
Pres. Jacob Zuma het ook nie die vermoë om sy kabinet se spandabelheid in toom te hou nie, het Trollip gesê.
“Kyk maar na die minister van kommunikasie, mnr. Siphiwe Nyanda.”
Nyanda was, benewens sy duur ampsmotors van R2,4 miljoen (bykomstighede ingesluit), onlangs weer in die nuus omdat hy nie in sy ampswoning in Claremont woon wanneer hy in Kaapstad is nie.
Hy gaan veel eerder tuis in die gesogte Mount Nelson- en Twelve Apostles-hotel.
Hy het sedert sy inhuldiging as minister van kommunikasie in Mei verlede jaar glo nog nie een nag in sy Kaapse ampswoning deurgebring nie.
Die DA het ’n parlementêre vraag aan die ministerie van kommunikasie gerig om vas te stel presies hoeveel dié verblyf die belastingbetaler uit die sak gejaag het.
- Die Burger