Regering tree dalk teen Malema op

2012-09-13 19:14

Kaapstad – Die regering oorweeg dit om teen die geskorste leier van ANC-jeuglia (ANCYL), Julius Malema, op te tree, het pres. Jacob Zuma Donderdag laat deurskemer.

Pres. Zuma het vrae van verskeie LP's in die Nasionale Vergadering geantwoord. Zuma het gesê dat "onaanvaarbare aktiwiteite" spanning in die mynbousektor vererger.

“Ek het met ministers wat betrokke is met die kwessies gesels oor hoe ons dit gaan hanteer. Ons gaan so gou as moontlik die publiek in kennis stel oor wat ons gaan doen, want dit kan nie langer aanvaar word nie.”

Zuma het in 'n klaarblyklike verwysing na Malema, wat vroeër die week mynwekers gevra het om ‘n landswye staking te hou, gesê dat dit nie net die stakende mynwerkers is wat met hierdie "onaanvaarbare aktiwiteite" besig is nie.

“Dit is sekere mense wat na die myne toe gaan om mynwerkers aan te hits om op ‘n sekere manier op te tree. Dit kan nie aanvaar word nie. Ons kyk daarna en sal so gou as moontlik daarteen optree,” het Zuma gesê.

Zuma het vroeër ‘n vraag wat beweer het dat hy vir Malema “gemaak het” geantwoord deur te sê dat hy nie vir "so 'n persoon" se optrede verantwoordelik is nie.

“Ek moet nie blameer word vir ‘n persoon wat sy eie karaktereienskappe het nie. Dis nie my skuld nie,” het Zuma te midde luidkeelse uitjouery gesê.

– Volg Nuus24 op Twitter
 

- SAPA