Regering stel weer gerus oor grondplan
2010-04-01 08:00
Kaapstad - Die nasionalisering van grond is nie op die kaarte nie.
Dié versekering is Woensdag wéér deur die departement van landelike ontwikkeling en grondhervorming gegee in reaksie op ’n artikel van Johannes Möller, president van Agri SA, wat Woensdag in Die Burger verskyn het.
Teenstrydige uitsprake oor grondhervorming het die laaste tyd tot heelwat verwarring en onsekerheid in landboukringe gelei.
Dit het gevolg nadat die departement ’n paar weke gelede sy omstrede strategiese plan aan die parlement voorgelê het wat daarop neerkom dat alle produktiewe landbougrond in die land tot nasionale bate verklaar word.
Gugile Nkwinti, minister van landelike ontwikkeling en grondhervorming, het kort daarna die versekering gegee dat die nasionalisering van grond nie oorweeg word nie. Hy het egter Maandag in ’n onderhoud met e.tv gesê dat hy, soos baie swart mense, die nasionalisering van landbougrond voorstaan.
Möller het Woensdag in sy artikel gewaarsku dat die bontpratery oor grondhervorming die land duur te staan kan kom.
Voedselsekerheid, werksgeleenthede en uitvoerdienste in ’n mededingende markomgewing kom volgens hom in die gedrang wanneer onsekerheid oor die beskerming van private besit die toekomsdenke van landbou-ondernemers oorheers.
Mtobeli Mxotwa, senior mediabestuurder, het in reaksie hierop in ’n verklaring gesê die departement het geen beleid van nasionalisering nie.
Hy het verduidelik dat die departement ’n mandaat het om die post-koloniale herkonstruksie en ontwikkeling te verseker deur middel van ’n omvattende landelike ontwikkelingsprogram.
’n Groenskrif oor die nuwe grondvoorstelle sal aan die kabinet voorgelê word vir bespreking.
“Die groenskrif sal voorstel dat die huidige eiendomsregstelsel hersien en vervang moet word met ’n drievlak-verblyfregstelsel sodat Suid-Afrika gelyke toegang tot grond en volhoubare grondgebruik kan bereik.”
Dit sluit in voorstelle oor staatsgrond wat verhuur word, beperkings op die besit van private grond, buitelandse eienaarskap en onsekere eiendomsreg wat verbind is aan produktiwiteit en vennootskappe met Suid-Afrikaners.
Mxotwa het gesê die kwessie van grondherindeling is ’n sensitiewe een wat die departement en sy relevante rolspelers met sorg moet hanteer.
- Die Burger