Regering staan by Simelane
2011-06-17 12:34
Lizel Steenkamp
Kaapstad - Pres. Jacob Zuma se regering het opnuut sy onvoorwaardelike steun aan adv. Menzi Simelane, die land se nuwe omstrede nasionale direkteur van openbare vervolging (NDOV), toegesê.
Voorts is Jeff Radebe, minister van justisie, se lof ook op die laaste kabinetsvergadering van die jaar besing oor die wyse waarop hy die uitbarsting rondom Simelane se aanstelling hanteer het.
“Die kabinet was baie tevrede omdat hy vinnig gereageer het om die feite vir die verslaggewers te gee. Die media skryf dikwels verkeerde berigte omdat die regering te lank wag om die regte inligting bekend te maak,” het Baby Tyawa van die regering se kommunikasiedienste gister gesê.
Erge kritiek uit verskeie oorde het op Zuma gereën nadat hy Simelane verlede Woensdag aangestel het. Radebe het vyf dae later ’n nuuskonferensie toegespreek om die vure te blus en te verduidelik waarom hy die Staatsdienskommissie se aanbevelings om tugstappe teen Simelane te doen, geïgnoreer het.
Volgens Tyawa het die kabinet nie die erge kritiek op Simelane se aanstelling bespreek toe hulle vir oulaas in Pretoria vergader het nie. Hul amptelike verklaring verwys net na “ongelukkige mediaberigte” en die “herhaling dat die regering vertroue in die NDOV het”.
Voorts het die kabinet mnr. Sicelo Shiceka, minister van koöperatiewe regering, se regrukplan vir plaaslike regerings goedgekeur. Dit moet teen Maart by alle munisipaliteite se ontwikkelingsplanne en begrotings ingesluit wees.
Shiceka het gister opnuut in ’n verklaring erken dat politieke inmenging by munisipaliteite dienslewering verlam. Hy het swak besluitneming deur raadslede, die aanstelling van bestuurders met bedenklike vaardighede en ’n gebrek aan deursigtigheid in die toekenning van tenders ook uitgesonder.
Shiceka wil hê munisipaliteite se geldelike en administratiewe probleme moet vóór die plaaslike verkiesings in 2011 aangespreek word. Sy departement gaan ook binnekort regulasies publiseer om onregmatige aanstellings en afdankings by munisipaliteite te takel. Voorts moet elke munisipaliteit sy eie regrukplan kry omdat die rade deur verskillende uitdagings in die gesig gestaar word.
Die regrukplan moet verseker dat munisipaliteite in gemeenskappe se basiese behoeftes voorsien, dat daar deursigtigheid en aanspreeklikheid is, wanbestuur en korrupsie tot ’n einde kom en dat professionele mense met die nodige vaardighede aangestel word.
- Die Burger