Regering spandeer miljoene op konsultante
2012-07-29 18:04
Johannesburg – Suid-Afrika se munisipaliteite het sowat R250 miljoen spandeer op hulp om hul finansiële state voor te berei, berig die Sunday Independent.
In 90% van die munisipaliteite was daar geen vakante poste in die finansiële departement nie, maar konsultante is aangestel, het Terence Nombembe, ouditeur-generaal (OG), in 'n onlangse verslag bekendgemaak.
KwaZulu-Natal het R79,8 miljoen spandeer op konsultante, met 'n gemiddeld van R1,9 miljoen per munisipaliteit.
In die Vrystaat het 24 van die 27 munispaliteite R32 miljoen spandeer op konsultante – 'n 6% toename in vergelyking met die vorige jaar.
Limpopo se 22 munispaliteite het R23 miljoen spandeer op konsultante.
Die munisipaliteite maak staat op konsultante wat nie die nodige vaardighede het om hulle te help nie, het die koerant berig.
In ander gevalle is die konsultante inderhaas aangestel en van die verkeerde inligting voorsien.
– Volg Nuus24 op Twitter
- SAPA
