Regering skuld R170,5 miljoen aan SA Bloeddiens
2009-12-03 09:05
Rajaa Azzakani
Kaapstad - Die regering skuld meer as R170,5 miljoen aan die Suid-Afrikaanse Nasionale Bloeddiens (SANBD), het dr. Aaron Motsoaledi, minister van gesondheid, gister gesê. Dit sluit lopende en agterstallige skuld in.
Van dié skuld, vir dienste by staatshospitale, is reeds in Julie aangegaan en strek tot Oktober.
Motsoaledi het in ’n omvattende geskrewe parlementêre antwoord op ’n vraag van Emma More, DA-LP, gesê hospitale se totale agterstallige skuld beloop net minder as R100 miljoen. Dié skuld is ouer as 30 dae.
More wou weet hoeveel provinsiale departemente die SANBD skuld, of geld aan die Wes-Kaapse bloeddiens geskuld word en wat die uitstaande bedrae is.
Sy het in reaksie haar ontevredenheid met die situasie uitgespreek. “Dit is onaanvaarbaar dat hulle (die provinsiale departemente van gesondheid) so lank sloer om hul skuld te betaal. Almal wil altyd begrotingsprobleme voorhou. Dit is bloot slegte beheerstelsels,” het More gesê.
Motsoaledi het gesê bykans R26 miljoen van dié skuld is 30 dae oud. Net meer as R10 miljoen van die skuld is 60 dae oud en R6,1 miljoen se skuld is 90 dae oud.
Meer as R50,7 miljoen moes teen einde Oktober betaal gewees het en die departement se lopende rekening het op R78,6 miljoen gestaan.
’n Totaal van 41 hospitale skuld meer as R1 miljoen. Die Chris Hani Baragwanath-hospitaal het die grootste uitstaande skuld met ’n rekening van R15,3 miljoen, gevolg deur die Steve Biko-hospitaal (R13,3 miljoen), die Dr. George Mukhari-hospitaal (R11,1 miljoen) en die Charlotte Maxeke-hospitaal (R10,8 miljoen) – almal in Gauteng.
Geen geld word aan die Wes-Kaapse bloeddiens geskuld nie.
More het gesê die Wet op die Bestuur van Openbare Finansies sê duidelik skuld moet binne ’n maand betaal word. Sy het ook gesê die openbare sektor moet sy finansies anders hanteer.
- Die Burger