Regering sal banke vra om boere te help
2011-01-26 06:56
Pretoria - Boere wat deur die vloede geraak is, sal nie met geld vergoed word nie, maar met saad en kunsmis gehelp word.
Hulle sal ook gehelp word met die herstel van beskadigde infrastruktuur soos damme en kanale, het Tina Joemat-Pettersson, minister van landbou, bosbou en visserye, Dinsdagmiddag hier aan die georganiseerde landbou gesê.
Plaaswerkers sal ook gehelp word.
Joemat-Pettersson het bygevoeg daar kan nie met die beplanning vir hulp begin word voordat die omvang van die skade nie bepaal is nie. Die staat moet presies weet wat die boere nodig het.
Verteenwoordigers van TLU SA, die National African Farmers Union en Agri SA het met Pettersson vergader. Dr. Pieter Mulder, die adjunkminister, was ook teenwoordig.
Joemat-Pettersson het aan die landbouverteenwoordigers gesê sy wil teen Vrydag ’n aanduiding hê van wat die vloedskade beloop.
“Ons besef die enormiteit van die krisis en ons wil die boere help om so vinnig moontlik weer produksie te hervat. Dit is noodsaaklik dat produksie spoedig na minstens ’n vlak van 80% kan herstel.”
Sy het verder gesê die regering sal met die banksektor en ander maatskappye onderhandel om boere te help. Sy het toegegee die hulpverleningsproses en die beskikbaar stel van geld vir ramphulp sloer baie. Volgens Mulder word daar nou probeer om dié proses te bespoedig.
Volgens Agri SA se voorlopige syfers beloop skade sowat R1miljard aan verlore oeste en dieselfde bedrag aan beskadigde infrastruktuur. “Dit is egter nog te vroeg om presies te sê wat die skade is omdat sommige gebiede nog onder water en ander onbegaanbaar is,” het Hans van der Merwe, uitvoerende hoof van Agri SA, ná die vergadering op ’n mediakonferensie gesê.
Volg Nuus24 op Twitter
- Die Burger