‘Regering nog verbind tot mediavryheid’
2011-08-06 08:00
Pretoria - Die regering is steeds verbind tot mediavryheid, het pres. Jacob Zuma Vrydagoggend in Centurion aan Suid-Afrikaanse mediahoofde gesê.
“As regering herbevestig ons ons verbintenis tot mediavryheid en die bevordering van mediavryheidsregte vir beide die publiek as gebruikers van mediaprodukte en die bedryf as vervaardigers,” het Zuma gesê.
Dié geskiedkundige eerste vergadering, hoofsaaklik met geslote deure, tussen Zuma en die mediahoofde is op versoek van die president gehou.
Daar is onder meer gepraat oor media-eienaarskap en transformasie van die media.
Die regering wil hê die personeelsamestelling van die verskillende mediagroepe, sowel as die inhoud van die produkte wat hulle publiseer of uitsaai, moet die Suid-Afrikaanse gemeenskap in alle opsigte weerspieël, het Zuma gesê.
“Jul produkte – van koerante en tydskrifte tot radiostasies en TV-kanale – verskaf ’n platform of ’n spieël waarmee die Suid-Afrikaanse lewenswyse en gemeenskap geprojekteer word.”
Daar is ook gepraat oor regeringsplanne met onder meer werkskepping en die stryd teen korrupsie.
Die vergadering het gevolg ná soortgelyke vergaderings vroeër tussen die mediahoofde en adj.pres. Kgalema Motlanthe en ’n tweede met Collins Chabane, minister in die presidensie vir monitering en evaluering.
“Ek wil dit beklemtoon dat ons almal – die regering, die gemeenskap en die mediabedryf – ’n verantwoordelikheid het om ’n vrye en onafhanklike media in ons land te ontwikkel. Ons moet streef na ’n media wat waarlik vry is van politieke, kommersiële, faksie- en ander belange,” het Zuma gesê.
Met die bevrydingstryd is hard geveg vir mediavryheid en vryheid van spraak en dit moet bevorder word.
Zuma het gesê die media speel ’n belangrike rol in die land omdat hy ’n kommunikasie-instrument vir die regering is waarmee hy regstreeks met die publiek kontak kan maak.
“Die inhoud van die media kan ook die land se ekonomiese groei en ontwikkeling beïnvloed omdat die manier waarop die media die land skets ’n uitwerking kan hê op die besluite wat mense buite die land oor Suid-Afrika neem,” het Zuma gesê.
Chabane het as voorsitter opgetree, terwyl Ebrahim Patel, minister van ekonomiese ontwikkeling, ook die vergadering toegespreek het.
Beide die druk- en elektroniese media is op senior vlak by die vergadering verteenwoordig.
Prof. Jakes Gerwel, voorsitter, en Esmaré Weideman, uitvoerende hoof, het Media24, verteenwoordig.
– Volg Nuus24 op Twitter
- Die Burger