Regering 'mislei nie media' oor Madiba
2012-12-14 07:37
Kaapstad – Die regering het nie die media of die land probeer mislei oor die hospitaal waar oudpres. Nelson Mandela opgeneem is nie, het Mac Maharaj, woordvoerder vir die presidensie, Vrydagoggend in 'n radio-onderhoud gesê.
Maharaj het op 702 Talk Radio gepraat oor berigte dat Mandela nié in 1 Militêre Hospitaal opgeneem is nie, maar wel in 'n vooraanstaande private hospitaal in Pretoria.
Nosiviwe Mapisa-Nqakula, minister van verdediging, het Maandag buite 1 Militêre Hospitaal aan verslaggewers gesê hy is daar opgeneem.
"Die minister sal vir haarself verduidelik, maar daar is geen strategie van die regering om die publiek te mislei nie," het Maharaj oor Mapisa-Nqakula gesê.
"Laat ek dit duidelik stel namens die presidensie: Ons het vir privaatheid
gevra, en ons het nooit gesê waar hy is
nie. En as jy nou terugkyk sal jy sien ons het glad nie van daardie stelling afgewyk nie.
Madiba sal luidens 'n berig van Eyewitness News Vrydag van die hospitaal na sy huis in Houghton verskuif word, maar Maharaj het gesê hy is nie seker hoe Mandela tans vaar nie.
"Ek het nie vanoggend se statusverslag nie; dis nog te vroeg. Die dokters het laas gesê sy toestand het verbeter, en daarmee volstaan ek."
Hy het gesê Mandela se gesondheid is in dié stadium die belangrikste, en hy wil nie bespiegel oor wanneer hy ontslaan word nie.
"Dis iets wat ek nie eers die dokters vra nie. Ek wil geen druk op hulle plaas nie. Hulle moet fokus op sy behandeling. As hy in die hospitaal moet bly vir 'n dag of twee langer, is dit goed so."
– Volg Nuus24 op Twitter.
- Nuus24
