Regering kan nie nog één boer verloor
2011-01-12 09:35
Senekal - Tina Joemat-Pettersson, minister van landbou, bosbou en visserye, het haar Dinsdag sterk uitgespreek teen geweldsmisdaad op plase en gesê die regering kan nie bekostig om een boer te verloor nie.
Sy het benadruk boere verlaat Suid-Afrika nie vrywillig nie, maar vlug noodgedwonge van plaasaanvalle. Sy ontken egter dat die aanvalle rasgemotiveerd is.
Joemat-Pettersson was Dinsdag op ’n besoek aan Pitso Sekhoto, ’n suksesvolle nuwelingboer, in die distrik Senekal.
Joemat-Pettersson het ’n blou oorpak, swart stewels en groot sonhoed gedra.
Sy het gesê kommersiële boere verlaat die land weens twee redes – om hul belange elders ter wêreld en op die vasteland uit te brei en om van plaasaanvalle te vlug.
“Dié boere verlaat ons nie, hulle vlug.
“Ons kan nie die boere verloor nie, want hulle het dekades se vaardigheid en kennis.
“Dit is vir ons ’n bekommernis – ons kan nie een enkele boer verloor weens iets soos plaasaanvalle nie.
“Die aanvalle is barbaars en kan ná 16 jaar van demokrasie nie geduld word nie.
“Dit hoort nie in ons samelewing nie,” het Joemat-Pettersson gesê.
Volgens haar kan nie gesê word dat plaasaanvalle rasgemotiveerd is nie.
“As dit rasgemotiveerd is, sou dieselfde swart mense in die woonbuurte ingegaan het en wit mense vermoor het.
“Hier het ons ’n scenario waar die meeste wit mense grond besit, en julle is kwesbaar omdat julle ver van alles is,” het sy gesê.
Volgens haar werk haar departement saam met die minister van polisie, Nathi Mthethwa, wat elke provinsie besoek om misdaad op die platteland te help oplos.
Joemat-Pettersson het gesê werk moet ook gemaak word van die geweld teen plaaswerkers.
Sy het gesê boere dra by tot die geweld as hulle goedkoop onwettige buitelandse arbeiders gebruik.
Die minster het die Makolobane-plaasprojek besoek ter stawing daarvan dat daar suksesvolle nuwelingboere is.
Sy het gesê dié plaas is ’n bewys dat grondhervormingsprojekte kan werk.
“Swart mense kan boer en grondhervorming kan werk. Dit beteken nie die regering gaan voedselsekuriteit inboet nie.
“Die landbou in die land kan nie groei sonder wit kommersiële boere nie,” het sy gesê.
Joemat-Pettersson het gesê sy het markte vir kommersiële boere in China, Indië, Brasilië, Rusland en die res van die vasteland verseker, maar het gevra dié boere moet nuwelingboere, soos Sekhoto, saamvat sodat hulle nie alleen hoef te boer nie.
- Volksblad