'Regering het nie genoeg gedoen'
2011-12-12 17:54
Johannesburg – Die Suid-Afrikaanse regering het nie genoeg gedoen om die teregstelling van ‘n Suid-Afrikaanse vrou in China vir dwelmsmokkelary te keer nie, het die Demokratiese Alliansie gesê.
“Terwyl ons vas glo dat dwelmsmokkelaars vir hul oortredings gestraf moet word, pas hierdie straf nie by die misdaad nie,” het Stevens Mokgalapa, DA-LP, gesê.
Hy het gesê die stappe wat deur die Suid-Afrikaanse regering geneem is, was nie genoeg om die vrou se lewe te red nie.
Janice Bronwyn Linden (35) van KwaZulu-Natal is deur middel van ‘n dodelike inspuiting tereggestel.
Sy is in November 2008 in Guangzhou in hegtenis geneem nadat sy met drie kilogram tik in haar bagasie betrap is. Sy is in 2009 aan dwelmsmokkelary skuldig bevind.
Die departement van internasionale betrekkinge het Maandag gesê President Jacob Zuma het tussenbeide probeer tree met die teregstelling.
“Hy [Zuma] het tussenbeide getree. Al die nodige stappe is op elke moontlike vlak, selfs die hoogstes, geneem,” het Clayson Monyela, woordvoerder, gesê.
Mokgalapa het gesê die DA sal verskeie vrae in die parlement voorlê om duidelikheid te kry oor die standpunt van die regering tydens die ingrypingsproses.
“Suid-Afrikaners verdien om te weet wat gedoen is om Linden en haar familie by te staan om te pleit vir ‘n regverdige vonnis en om verseker te word dat die Suid-Afrikaanse regering se versuiming om politieke druk toe te pas, nie te wyte is aan ons blykbare menseregte-blindekol waar China betrokke is nie,” het Mokgalapa gesê.
Die IVP het Maandag gesê die Chinese regering moes sy handelverhoudinge met Suid-Afrika oorweeg het voor Linden tereggestel is.
“Met die huidige groeiende handelverhoudinge tussen China en Suid-Afrika, sou ‘n mens hoop hierdie verhouding sou China anders beïnvloed het,” het Ben Skosana, IVP-LP, in ‘n verklaring gesê
- Volg Nuus24 op Twitter
- SAPA