Regering gee lisensie vir myn op erfenisgebied
2010-02-03 15:33
Kaapstad - Die toekoms van die Mapungubwe-oorgrensspark in Limpopo is in die gedrang nadat dit aan die lig gekom het dat die regering 'n lisensie aan 'n oorsese mynmaatskappy toegeken het om 'n myn op dié erfenisgebied op te rig.
Nuus24 kan bekend maak dat die Australiese maatskappy, CoAL Africa, Dinsdag deur die departement van minerale en energie Dinsdag die lisensie gegun is om voort te gaan met die oprig van 'n oopgroefkoolmyn en kragstasie, genaamd 'Vele coal mine/Mulilo power station' in die buffersone van die uiters ekologies sensitiewe en kultureel waardevolle Mapungubwe.
Die park grens met Botswana en Zimbabwe en is is ook 'n oorgrenspark: 'Greater Mapungubwe Transfrontier Conservation Area' (met Botswana en Zimbabwe) en is amptelik deur UNESCO as Wêrelderfenisgebied erken.
Daar is ook sprake dat 'n kragstasie in die gebied opgerig gaan word.
Werknemers van die park meen die myn en kragstasie sal die gebied se amptelike grondgebruik, (soos ooreengestem en onderteken deur onderskeie verteenwoordigende ministers tydens 'n driebenige memorandum van verstandhouding in 2006) van bewaring na industrieël verander.
"Ons is totaal onkant gevang hierdeur," het Johan Verhoef, internasionale koördineerder vir die Groter Mapungubwe-oorgrenspark gesê.
Volgens Verhoef het die Australiese maatskappy nie 'n waterlisensie nie.
"Die gebied is baie droog, en die ekologie hier is baie sensitief. Die myn gaan dus 'n negatiewe impak hê," het Verhoef gesê.
"Daar was beoog om 'n verdrag tussen Suid-Afrika, Botswana en Zimbabwe hierdie jaar op die been te bring, maar met die regering se toekenning van die mynlisensie lyk dinge duister," aldus Verhoef.
Die departement van minerale en energie se woordvoerder, Jeremy Michaels, het aangedui hy is bewus van die saak, maar het gesê die departement sal later op Nuus24 se vrae reageer.
- Nuus24