Regering: Snelbus-skietery lafhartig
2009-09-02 10:18
Johannesburg – Die Gautengse regering het die skietery op ’n snelbus waarin twee mense gewond is, ’n “lafhartige daad”genoem.
“Ons veroordeel die gewelddadige aanval op die BRT-bus in Soweto ten sterkste. Dié lafhartige daad is gedoen om pendelaars en die gemeenskap met geweld te intimideer,” het Thabo Masebe, provinsiale woordvoerder, gesê.
’n Polisieman en ’n passasier is Dinsdagaand aan boord die snelbusdiens (BRT) gewond nadat skote vanuit ’n minibus in Soweto op hulle gevuur is.
Hulle is in ’n stabiele toestand in die hospitaal, het Kay Makhubela, ’n polisiewoordvoerder, gesê.
Sekerheid en polisieteenwoordigheid op die busse is intussen verskerp.
Die provinsiale regering het die polisie gevra dat die skuldiges aan die pen ry.
Masebe het gesê die busdiens gaan voort en intimidasie sal nie dié diens ontwrig nie.
– Sapa