Reg eis nou sy pond vleis
2010-07-04 10:49
Rapport
Johannesburg - ’n Ou dreigement van Jackie Selebi spook waarskynlik nou by dié oudpolisie- en Interpolhoof nadat hy Vrydag in die Suid-Gautengse hooggeregshof aan korrupsie skuldig bevind is.
Bykans vier jaar gelede het Selebi gesê hy gaan “van Sandton City se dak afspring” as hy aan korrupsie skuldig bevind sou word.
Selebi se vonnis sal eers oor tien dae bekend wees, maar daar was teen Vrydag ná sy skuldigbevinding geen aanduiding dat hy hom vir enige springery gereed maak nie.
Die uitslag van dié marathonverhoor plaas ook opnuut die aandag op oudpres. Thabo Mbeki, wat in 2006 op ’n vergadering met kerkleiers gesê het: “Glo my gerus oor Selebi. Ek sal beslis stappe doen as daar enige ongerymdhede is.”
Selebi het tereggestaan op aanklagte van korrupsie en regsverydeling nadat hy glo bykans R1,2 miljoen van sy voormalige mynmagnaat-vriend, Glen Agliotti, en ander sakemanne in die onderwêreld, in ruil vir polisie-inligting gekry het.
Hy is onskuldig bevind aan regsverydeling.
Regter Meyer Joffe het tydens sy twee dae lange uitspraak Donderdag en Vrydag behoorlik onder Selebi en Agliotti ingeklim.
Die staat, onder leiding van adv. Gerrie Nel, het sterk op Agliotti se getuienis gesteun.
“Selebi is ’n man van lae morele waardes wat nie vertrou kan word nie…hy het geen respek vir hofprosedure nie.
“…Agliotti kan beskryf word as een van die onbetroubaarste getuies wat al ooit in die hof getuig het,” het Joffe gesê.
Oor albei die mans het hy te sê gehad: “Hulle is albei vreemdelinge vir die waarheid.”
Maar Joffe het nie net die sweep geklap nie. Hy het ook Vusi Pikoli, destydse direkteur van die nasionale vervolgingsgesag, en Dianne Muller, Agliotti se destydse verloofde, geprys.
“Pikoli was ’n goeie, betroubare getuie,” het hy gesê.
“Muller is ’n vrou met ’n sterk wil… haar getuienis kan nie verwerp word nie omdat sy in ’n stadium die beskuldigde in die oë gekyk het en gesê het: ‘Hy lieg.’”
Die verpligte minimum straf vir iemand wat aan korrupsie skuldig is, is 15 jaar tronkstraf as die bedrag meer as R500 000 is.
Paul O’Sullivan, oud-groephoof van veiligheid by die Lughawensmaatskappy van Suid-Afrika (Acsa), het ná die uitspraak uit ’n sterk bewoorde verklaring voorgelees dat dié saak ’n bewys van geregtigheid is.
Hy het ’n groot rol gespeel in die Skerpioene se ondersoek wat gelei het tot die aanklagte van bedrog, korrupsie en regsverydeling teen die polisiebaas, en is in 2003 uit sy pos afgedank.
“Nege jaar gelede sou ek nooit kon raai dat ek met Selebi en sy bose boesemvriende te doen sou hê nie.”
Hy sê in 2005 het Suid-Afrika ’n laagtepunt bereik en in die hande van bendes verval. Boonop het Suid-Afrikaners Mbeki vertrou toe hy om dié vertroue gevra het.
“Skaam jou, Selebi. Skaam jou, Mbeki.”
- Volg Nuus24 op Twitter.
- Rapport