Reeva se ouers stel eie regspan aan
2013-02-26 08:23
Johannesburg – Reeva Steenkamp se ouers het regsverteenwoordigers aangestel om hulle belange te beskerm ná hulle dogter op Valentynsdag in die huis van die Paralimpiese sportheld Oscar Pistorius doodgeskiet is, het berigte Dinsdag gelui.
June en Barry Steenkamp het in 'n verklaring wat Maandag vrygestel is, gesê dit is 'n baie traumatiese en hartseer tyd vir hulle, en hulle verstaan die intense mediabelangstelling wat met die saak gepaardgaan, het Eyewitness News berig.
Die Steenkamps het die media gevra om hulle privaatheid te respekteer en gesê hulle sal vir eers nie enige onderhoude toestaan nie.
Pistorius is van moord aangekla ná Steenkamp op 14 Februarie in sy huis in Pretoria doodgeskiet is.
Hy is borgtog van R1 miljoen toegestaan. Hy is toegelaat om 'n aanvanklike paaiement van R100 000 te betaal, en moet die res van die bedrag teen 1 Maart betaal.
Steenkamp is op 19 Februarie in 'n private seremonie in Port Elizabeth veras.
Die prokureur Mike Venter en senior advokaat Dup de Bruyn is deur die Steenkamp-familie aangestel om na hulle belange om te sien, het die berig gelui.
Pistorius se volgende hofverskyning is op 4 Junie.
– Volg Nuus24 op Twitter.
- SAPA
