Reeva se lyk binnekort uitgeken

2013-02-15 10:35

Pretoria – Die lyk van die vermoorde model Reeva Steenkamp sal Vrydag formeel uitgeken word, berig Eyewitness News.

"Reeva sal vanoggend uitgeken word deur iemand na aan haar wat in die Pretoria/Johannesburg-gebied is," het Steenkamp se oom, Mike, gesê.

Steenkamp is Donderdagoggend doodgeskiet in die Paralimpiese atleet Oscar Pistorius se huis. Hy is in hegtenis geneem en  verskyn Vrydag in die hof in verband met die voorval.

Hoewel Pistorius se borgtogaansoek Vrydagoggend sal begin, is daar steeds geen waarborg dat hy binnekort vrygelaat sal word nie.

Medupe Simasiku van die nasionale vervolgingsgesag het gesê dit is te vroeg om kommentaar te lewer oor die moontlike aanklagte waardeur Pistorius in die gesig gestaar word.

Die staat het aangedui dat hy borgtog gaan teenstaan.

Intussen het Riah Phiyega, nasionale polisiehoof, Steenkamp se dood as "tragies" bestempel.

– Volg Nuus24 op Twitter