Reeva se familie pleit vir die waarheid

2013-02-23 08:04

Pretoria – Die familie van die vermoorde Reeva Steenkamp sê hulle wil net die waarheid weet oor wat met hul dogter gebeur het toe sy verlede week op Valentynsdag in Oscar Pistorius se huis in Pretoria doodgeskiet is.

Die Steenkamp-familie het opnuut gesê dat hulle nie die verhoor sal bywoon nie en dat niks hul dogter sal terugbring nie.

Pistorius is Vrydag vrygelaat nadat hy die eerste R100 000 van sy borgtog van R1 miljoen by die Brooklyn-polisiekantoor in Pretoria betaal het.

Die oorblywende bedrag moet teen 1 Maart vereffen wees.

Pistorius het Vrydagaand in sy oom se huis in Waterkloof oornag.

Een van die borgvoorwaardes is dat hy nie na sy huis in Silverwoods in Pretoria mag terugkeer nie.

Hy moet ook sy paspoort inhandig en mag nie vir enige reisdokumente aansoek doen nie.

Pistorius is aangesê om lughawens te vermy en elke Maandag en Vrydag tussen 19:00 en 13:00 by die Brooklyn-polisiestasie aan te meld.

Sy saak is tot 4 Junie uitgestel.

Volg Nuus24 op Twitter.

- SAPA