Oscar staan tereg op skedule 6-misdaad

2013-02-19 12:39

Pretoria – Hooflanddros Desmond Nair het Dinsdag in die Pretoriase landdroshof beslis dat die dood van die model Reeva Steenkamp 'n skedule 6-misdaad is, het verskeie mediabronne uit die Pretoria-landdroshof berig.

Die Paralimpiese atleet Oscar Pistorius se regspan sal nou moet bewys dat daar buitengewone omstandighede is wat borgtog vir die atleet regverdig.

Hy het snikkend in die beskuldigdebank gesit terwyl die landdros sy bevinding uitgelees het.

Pistorius staan tereg op aanklag van moord ná Steenkamp se skietdood in sy huis verlede Donderdag. Die hof het vroeër gehoor vier skote is afgevuur, waarvan drie die model getref het.

Adv. Gerrie Nel, vir die staat, het verder aangevoer dat Steenkamp haar in die badkamer toegesluit het omdat sy van Pistorius gevlug het.

Adv. Barry Roux, wat Pistorius verteenwoordig, het op sy beurt aangevoer dat Steenkamp se dood nie moord was nie.

Roux het gesê hy sou dink die staat se saak sal wees dat daar probleme in die paartjie se verhouding was.

Hy het gesê Pistorius sal in detail verduidelik wat presies daardie aand gebeur het. Die verdediging het verder gesê die feit dat Pistorius die badkamerdeur afgebreek het, dui daarop dat hy Steenkamp wou help en haar nie wou seermaak nie.

– Volg Nuus24 op Twitter