Reeva se 'Joburg-pa' praat
2013-02-24 14:50
Pretoria – Die moordbeskuldigde atleet Oscar Pistorius se "gewete sal hom opvreet", het 'n vriendin van Reeva Steenkamp se pa gesê.
"... Wat ook al gebeur, of hy tronk toe gaan of nie... Hy kan brand in die hel. Sy gewete sal hom opvreet," het Cecil Myers, by wie Steenkamp in Johannesburg gewoon het, in 'n onderhoud met Rapport gesê.
Steenkamp was Myers se dogter Gina se beste vriendin en het sedert September by die gesin gewoon. Steenkamp het na Myers as haar "Johannesburg-pa" verwys.
Pistorius word daarvan beskuldig dat hy Steenkamp op Valentynsdag in sy huis in die ooste van Pretoria doodgeskiet het. Hy is Vrydag in die Pretoriase landdroshof borgtog van R1 miljoen toegestaan.
Myers het ook verlede Vrydag Steenkamp se lyk gaan uitken.
“Dit was vir my verskriklik erg; ek kon nie self terugbestuur huis toe nie.”
Myers het Steenkamp se pa, Cecil die eerste keer by haar begrafnis in Port Elizabeth ontmoet.
"Haar pa het my aan vriende voorgestel as Reeva se ‘Joburg-pa’. Hy’t aanhou dankie sê dat ek so mooi vir sy dogter in Johannesburg gesorg het, haar veilig gehou het.”
Myers het gesê hy het Woensdagaand die laaste keer van Steenkamp gehoor.
“Ek het hierdie ding met al drie kinders (Reeva en sy eie dogters, Kim en Gina): As hulle nie die aand huis toe kom nie, moet hulle SMS. Toe SMS Reeva: ‘Hi guys, I’m too tired, it’s too far to drive, I’m sleeping at Oscar’s tonight. See you tomorrow.’
“Môre het nooit vir haar aangebreek nie... Ek het snags nagmerries oor hoe bang sy moes wees. Kan jy jou índink hoe bang sy was?
Myers verkwalik ook homself vir Steenkamp se dood en wonder wat hy kon gedoen het om dit te verhoed.
“Dis vir my die ergste: Hét Reeva maar eerder ’n kans gevat en huis toe gery daardie aand...
“Ek moes haar terug geSMS het: ‘Ons kry jou halfpad, dan ry ek en Desi [sy vrou] jou kar terug.’ Dan was sy nou veilig.”
Hy het aan die koerant gesê slegs Pistorius sal weet wat die aand van die skietery gebeur het.
“Sý kan nie meer vertel nie.”
– Volg Nuus24 op Twitter
