Reeva-moord: Staat het 'sterk saak'
2013-02-20 18:06
Pretoria – Die nasionale vervolgingsgesag sê die staat het baie vertroue in sy saak teen Oscar Pistorius.
Medupi Simasiku, ‘n woordvoerder van die NVG, sê die hoof-ondersoekbeampte in die saak, Hilton Botha, is nie vroeër die dag deur die verdediging se ondersoek “gediskrediteer” nie.
“Dit is normaal dat ‘n kruisondervraging só verloop...” het hy gesê.
“Die borgtogaansoek is steeds aan die gang, maar die staat is steeds vol vertroue dat ons gaan kry wat ons wil hê. Die status quo bly dieselfde tot môre [wanneer die borgtogaansoek voortduur].”
Pistorius se aansoek om borgtog word deur die staat teengestaan, nadat hy van die moord op sy vriendin, Reeva Steenkamp, aangekla is.
Die staat wil aanvoer dat dit moord met voorbedagte rade was.
Sy advokaat, Barry Roux, het in die hof die polisie daarvan beskuldig dat hulle die misdaadtoneel besmet het terwyl hulle die noodlottige skietery ondersoek het.
Hy het die ondersoekbeampte daarvan beskuldig dat hy sonder beskermende voet-bedekkings in die huis in Silwer Woods, Pretoria, rondgeloop het.
Botha het gesê hy moes dit aantrek, maar dat daar geen bedekkings beskikbaar was nie.
Volg Nuus24 op Twitter
