Reeva is nié aangerand

2013-02-20 14:14

Pretoria – Die polisie het Woensdag gesê daar is geen tekens dat Oscar Pistorius die model Reeva Steenkamp aangerand het voor hy haar geskiet het nie.

Dít volg ná berigte dat 'n bebloede kolf in die ster-atleet se huis gevind is.

Ao. Hilton Botha, ondersoekbeampte, het tydens Pistorius se borgtogaansoek in die Pretoriase landdroshof gesê daar was "geen tekens van 'n aanranding nie en geen tekens dat sy haar teëgesit het nie".

Botha is deur adv. Barry Roux, vir die verdeding, onder kruisverhoor geneem.

Roux het vroeër gesê die "testosteroon" wat in Pistorius se huis gevind is, was 'n kruiemiddel en nié 'n verbode middel nie.

"Dit is 'n kruiemiddel. Dit is nie 'n steroïed nie en dit is ook nie 'n verbode middel nie," het Roux gesê.

Botha het vroeër getuig dat 'n boks testosteroon en naalde in 'n boks onder 'n TV in Pistorius se huis gevind is.

Pistorius word daarvan beskuldig dat hy sy vriendin, die model Reeva Steenkamp, op Valentynsdag vermoor het.

Roux het gesê die polisie moet 'n apteker vra om die middel so gou as moontlik te toets.

Die borgtogaansoek duur voort.

– Volg Nuus24 op Twitter