Reeva, Oscar had 'wonderlike' verhouding
2013-02-14 12:36
Kaapstad – Reeva Steenkamp se reklame-agent het gesê die model en die ster-atleet Oscar Pistorius het 'n wonderlike verhouding gehad.
Sarit Tomlinson het Donderdag met Sky News gepraat nadat Steenkamp in Pistorius se huis in die ooste van Pretoria doodgeskiet is.
"Sy was 'n ongelooflike meisie, sy was baie talentvol en intelligent. Hulle was 'n paar maande saam. Dit was 'n fantastiese verhouding. Dit was 'n goeie, gesonde verhouding.
"Op die oomblik weet niemand wat gebeur het nie. Daar is nie veel inligting wat ek nou vir jou kan gee nie."
Pistorius is volgens die dagblad Beeld Donderdag net voor 12:00 by die Boschkop-polisiekantoor weg saam met sy prokureur en polisiemanne in burgerlike drag.
Hy sal volgens die koerant na verwagting na ‘n distriksgeneesheer geneem word vir toetse voordat hy in die tronkhof by die Pretoriase Sentrale Gevangenis sal verskyn op ‘n aanklag van moord.
Kate Silvers, Pistorius se skakelbeampte in Londen, het gesê sy wil nie in hierdie stadium kommentaar lewer nie.
"Ons sal moontlik later 'n verklaring uitreik," het sy gesê.
Peet van Zyl, Pistorius se bestuurder, en Ampie Louw, die Pretorianer se afrigter, kon nog nie vir kommentaar bereik word nie.
– Volg Nuus24 op Twitter
