Reën tref Wes-Kaapse boere hard
2010-12-18 07:18
Kaapstad - Ná die groot reën die afgelope twee dae probeer inwoners en boere aan die Weskus die skade, wat na raming miljoene rande beloop, bepaal.
In die Sentraal- en Klein-Karoo is die droogte egter nog nie gebreek nie.
In Lutzville en Vredendal is daar veral kommer oor die besproeiingskanaal wat plek-plek weggespoel het en na verwagting eers einde volgende week herstel sal wees.
Die kanaal voorsien water aan boere in die omgewing. Daarsonder sal die gewasse in snikhete somersdae sonder water wees.
“Die grond is gelukkig nog nat, maar ons het net genoeg water vir drie of vier dae,” het Jacques Mollentze van Lutzville, wat met groente boer, gister gesê.
Kontrakteurs het reeds begin met die herstelwerk aan die kanaal, wat meer as R1,5 miljoen kan kos.
Benewens strukturele skade is die landboubedryf in dié omgewing ook deur die reën geknou.
“Die reën is ongekend,” het Carl Opperman, uitvoerende hoof van Agri Wes-Kaap, gesê. “Wynboere kan vir drie weke nie by hul wingerde uitkom nie en siektes soos donsskimmel kan uitbreek. Botrytis kan in tafeldruiwe begin voorkom.”
Nico Greeff, voorsitter van die Tafeldruifvereniging in Vredendal, het gesê sekere druifkultivars wat na dele van Europa en die Verre Ooste uitgevoer word, is heeltemal deur die reën beskadig.
“Die flame seedless-tafeldruiwe het oopgebars en sommige boere het yslike verliese gely,” het hy gesê.
Volgens hom kan dié druifkultivar weens die reën ’n inkomste van slegs R20000 per hektaar druiwe vir 2011 lewer, pleks van R500 000 soos gewoonlik.
Andre Engelbrecht, ’n tafeldruifboer van Vredendal, het gesê hy verwag om ’n verlies van tussen R1 miljoen en R1,6 miljoen te ly.
“Ek kan gewoonlik 25 000 kissies druiwe van 4,5 kg elk per seisoen verpak, maar kon net 9 000 kissies verpak voordat die reën neergesak het.
“Die druiwe van die ander16 000 kissies sal heel waarskynlik weggegooi moet word.”
Die reën het Donderdag vroegmiddag van die Weskus gewyk en gister in die vroeë oggendure in die Sentraal- en Klein-Karoo ophou val.
Ofskoon dit die afgelope twee dae 30 mm in Beaufort-Wes gereën het, het die Gamkadam geen water bygekry nie, het Hein Rust, hoof van rampbestuur van die Sentraal-Karoo-distriksmunisipaliteit, gesê, berig Tisha Steyn.
In Oudtshoorn, waar dit die afgelope twee dae 27,6 mm gereën het, word waterbeperkings verslap.
Damvlakke in die Suid-Kaap het ook danksy die reën gestyg.
In George het die vlak van die Tuinroetedam gister tot 91,49% gestyg, maar in Mosselbaai het die Wolwedansdam se vlak gister op 46,8% gestaan, berig Eugene Gunning.
Niek Koegelenberg van die Kaapstadse weerkantoor het gesê daar is vandag en môre aan die Weskus ’n kans op reën in Vredendal, Clanwilliam en Springbok. In die Suid-Kaap word reën vir Riversdal, Oudtshoorn, Stilbaai, Mosselbaai en George voorspel.
“Ligte reën word verwag en geen waarskuwings oor swaar neerslae is uitgereik nie. Teen Maandag sal daar net in die George-omgewing nog ’n moontlikheid van reën wees.”
- Volg Nuus24 op Twitter.
- Die Burger