Reeksverkragter kry 135 jaar
2011-09-20 08:09
Virginia – ’n Reeksverkragter wat ’n skrikbewind in die Goudveld gevoer het, in hegtenis geneem is, ontsnap en toe daarna nog twee vroue aangeval het, is hier in die rondgaande hof 135 jaar tronkstraf opgelê.
Petrus Khotso Kalao (28), wat op 20 aanklagte tereggestaan het, is deur regter C.J. Musi op 15 daarvan, waaronder vyf van verkragting, skuldig bevind. Kalao se aansoek om verlof tot appèl teen sy vonnis is deur regter Musi geweier.
Daar is gelas dat van dié vonnisse samelopend uitgedien word en weens die samelopende effek daarvan sal Kalao effektief 45 jaar tronkstraf uitdien.
Hy is kort ná sy ontsnapping by die landdroshof in Augustus 2009 weer in hegtenis geneem waar hy met ’n gesteelde vuurwapen onder sy kopkussing geslaap het.
Hy is skuldig bevind op aanklagte van verkragting, poging tot verkragting, huisbraak met die opset om te steel en diefstal, roof met verswarende omstandighede, koperdiefstal van R26 000, die onwettige besit van ’n wapen en ammunisie, huisbraak met die opset om te roof, roof met verswarende omstandighede en ontsnapping.
Die eerste drie vroue, ’n ingenieursassistent (27), ’n voertuigbestuurder (40) en ’n banksman (24), is die nag van 3 Julie 2009 by hul werkplekke by die Pres. Brand-goudmyn oorval.
Die ingenieursassistent en die voertuigbestuurder is verkrag en beroof en die banksman onsedelik aangerand, met ’n vuurwapen oor die kop geslaan, gewurg en beroof.
Ná Kalao se ontsnapping is op nog twee vroue toegeslaan – ’n prokureur (33) van die stad, en twee weke later haar buurvrou, ’n 41-jarige senior bestuurder by ’n groot maatskappy in die Noord-Vrystaat. Hulle het hom aan sy foto’s in Volksblad herken. Van die slagoffers is vir sielkundige behandeling in die hospitaal opgeneem en het in die verhoor getuig hul lewe is vernietig en sal nooit weer dieselfde wees nie.
Kalao was reeds op borgtog ná inhegtenisnemings op verskeie ander aanklagte toe die eerste vroue oorval is.
Hy is op ’n uitkenningsparade deur van die vroue uitgeken.
Adv. Colin Steyn het aangekla en ao. Yolanda Hulme was die ondersoekbeampte.
Volg Nuus24 op Twitter.
- Volksblad