Reeksverkragter in hegtenis
2012-02-02 19:58
Johannesburg – ‘n Veertigjarige man is in die Oos-Rand in hegtenis geneem nadat hy na bewering ongeveer 40 meisies tussen die ouderdomme van 10 en 14 verkrag het, het die polisie in Gauteng Donderdag gesê.
Die man is Dinsdag omstreeks 02:00 in Edenpark in hegtenis geneem, het lt. kol. Lungelo Dlamini gesê.
“Hy is in hegtenis geneem nadat een van die slagoffers hom na sy huis gevolg het en later die ondersoekbeampte ingelig het.”
Die meisies – van Katlehong, Thokoza en Vosloorus – is na bewering na ‘n oop veld gelok en daar verkrag tussen 2007 en 2011.
“Ná sy inhegtenisneming is ‘n uitkenningsparade gehou. Verskeie slagoffers het hom positief geïdentifiseer,” het Dlamini gesê.
Hy het gesê die slagoffers is almal op ‘n soortgelyke wyse en onder dieselfde omstandighede verkrag. DNS-uitslae van al die meisies verbind hom ook met die misdade.
Die man se modus operandi was om meisies te vind wat in die straat gespeel het en hulle van mekaar te verwyder deur hulle in verskillende rigtings te stuur. Hy sou dan een van hulle na ‘n oop veld neem, met ‘n geweer dreig en verkrag. Hy het na bewering meisies ook van winkels of winkelsentrums af gevolg en hulle daarvan beskuldig dat hulle geld vervals het.
“Hy sou aan hulle sê dat hy instruksies gekry het om hulle voor te keer en dat hulle in hegtenis geneem sou word. Terwyl hy gemaak het of hy hulle help om inhegtenisneming te vermy, het hy hulle na ‘n oop veld geneem en verkrag.”
Die man sal na verwagting Vrydag in die Alberton-landdroshof verskyn.
“Die polisie sal borgtog teenstaan om met die ondersoek voort te gaan en verdere uitkenningsparades te hou,” het Dlamini gesê.
- Volg Nuus24 op Twitter
- SAPA