Rassistiese aanvalle: Vyf voor
2010-06-25 23:27
Johannesburg - Vyf mans aangekla van rassistiese aanvalle het Vrydag vlugtig in die Zeerust-landdroshof verskyn.
Martinus Smith (23) en Jonas Lubbe (31), voor die hof oor 'n aanval waarin hulle glo Oupa Bethuel Randa (51) doodgeslaan het, is elk op borgtog van R1000 vrygelaat.
Die saak teen hulle is tot 30 Junie uitgestel, het lt. genl. Lesetja Beetha van die Noordwes-polisie gesê.
Randa was die hoof van Sebako-laerskool in Driefontein.
Die paar word ook aangekla van die aanranding van 'n polisieman en sy vriend toe die paar 'n plaaslike taverne Maandagaand verlaat het.
Die polisieman was nie aan diens nie.
Die 28-jarige Christiaan van der Merwe en twee minderjarige beskuldigdes het in aparte sake voor die hof verskyn vir die besit van gevaarlike wapens, het Beetha gesê.
Hulle word verdink van rassistiese aanvalle in Zeerust.
Die trio is met 'n waarskuwing vrygelaat.
Volg Nuus24 op Twitter.
- SAPA