Rasherrie oor gala wat afgestel is
2011-03-06 10:32
’n Rasherrie het die Suid-Afrikaanse swemgemeenskap getref toe die nasionale swemgala vir skole op die nippertjie gekanselleer is.
Dit is gedoen omdat provinsiale spanne “uit 99% wit kinders” bestaan.
Die kampioenskap is afgestel enkele dae voordat dit Vrydag en Saterdag by die Kings Park-swembad in Durban gehou sou word.
Die beste jong swemmers in Suid-Afrika én ander Afrika-lande sou daaraan deelneem.
Woedende en teleurgestelde ouers wat reeds verblyf- en reisreëlings getref het, het aan Rapport gesê hulle is eers verlede Donderdag ingelig dat die gala van die baan is.
Daar word verneem die miljoene rande wat aan die Durban-byeenkoms bestee sou word nou vir die ontwikkeling van swemmers uit voorheen benadeelde gebiede gebruik gaan word.
Sommige ouers is so ontnugter dat hulle dit oorweeg om hul kinders buiteland toe te stuur om hul swemloopbaan in en vir ander lande voort te sit. Een het reeds swemfederasies in Amerika en Australië genader, terwyl ’n skool in Duitsland belang stel in ’n ander.
Sedert Suid-Afrika tot internasionale sport hertoegelaat is, het swemmers die meeste Olimpiese medaljes huis toe gebring.
Shaun Adriaanse, uitvoerende hoof van Swem Suid-Afrika (SSA) wat skole-swem administreer, het Rapport na die departement van sport verwys.
Paena Galane, woordvoerder van dié departement, het gesê daar is in Mei verlede jaar met belanghebbendes op ’n 50/50-kleurverteenwoording op skoleswembyeenkomste ooreengekom.
Slegs dán sou die departement dié byeenkomste verder ondersteun.
“SSA het nog ’n jaar gevra om met hul slegs-wit-program voort te gaan, maar die departement stáán by die ooreenkoms dat 50% ontwikkeling-swemmers móét wees,” het Galane gesê.
“SSA het op hul eie voortgegaan met dié kampioenskap wat 99% wit is. Daarom is dit (die nasionale kampioenskap vir skole) nie meer op die departement se kalender nie.
“In die gees van sportontwikkeling wil ons meer verteenwoordigende swemspanne sien voordat ons weer betrokke sal raak.”
’n Ingeligte bron het gesê die departement van basiese onderwys reik ook binnekort ’n verklaring hieroor uit.
Clive Cox, ’n swemafrigter, het gesê daar is onlangs besluit dat ’n ander gala vir slegs vlak1- en 2-swemmers gehou gaan word waarvan 50% ontwikkelingswemmers moet wees. Die beste swemmers is vlak3-swemmers.
Gerhard Labuschagne, ’n ontstelde Gautengse pa, het gesê dit het ouers baie geld gekos om hul kinders vir provinsiale proewe in te skryf.
“Ons het al plek in Durban bespreek en dit kos byna R10000 vir albei ouers om so ’n gala by te woon.
“Die meeste swemmers is ook afhanklik van beurse by skole. Dié wat nie beurse het nie, verbeur nou hul kans om ere-kleure as erkenning van hul skole te kry.
“Wat sê ’n mens nou vir jou kind wat graag vir Suid-Afrika wil swem, maar weens dit (die departement se ingryping) sy heil oorsee moet gaan soek?”
Braam van Niekerk, ’n pa van ’n 12-jarige topswemmer, het gesê hy kan hom nie indink wat die besluit aan ’n kind doen wat ’n jaar lank vir die kampioenskap geoefen het nie.
Mark Skea, ’n oud- nasionale swemmer en afrigter wie se kind ook sou deelneem, sê die kinders is die grootste verloorders.
“Wanneer gaan die burokratiese administrateurs op die regte kwessies, soos die swemmers, konsentreer en nie op hul verheerlikte ego’s nie?”
- Rapport