Ras-program by skool aangebied
2010-09-21 09:15
Johannesburg - ’n Program teen stereotipering en rassistiese afknouery onder alle rassegroepe gaan by die Hoër Volkskool Heidelberg van stapel gestuur word.
Dié stap volg nadat daar verlede week weer bewerings oor aanrandings tussen leerlinge van verskillende rasse by die skool was.
Die beheerliggaam het gister in ’n verklaring gesê sedert hul aanstelling en dié van Jan van Heerden as skoolhoof verlede jaar is ses gevalle van aanranding by die polisie aangemeld.
Net twee daarvan kan as rassistiese afknouery geklassifiseer word, lui die verklaring.
In die eerste geval is ’n swart leerling skuldig bevind nadat hy ’n wit leerling sowat ’n jaar gelede aangerand het. In die tweede voorval, wat onlangs plaasgevind het, het ’n wit leerling ’n swart leerling glo aangerand.
Daar word nog op die uitslag van dié ondersoek gewag.
Volgens die polisie is 23 klagte van aanranding sedert 2006 by hulle aanhangig gemaak.
Luidens die verklaring was daar 14 sake (61%) waar wit leerlinge wit medeleerlinge aangerand het.
In twee gevalle (9%) het swart leerlinge ander swart leerlinge aangerand.
Daar was drie gevalle (13%) waar ’n wit leerling ’n swart leerling aangerand het en vier (17%) waar ’n swart leerling ’n wit leerling aangerand het.
Die statistieke dui daarop dat byna 70% van alle aanrandings nie oor kleurgrense heen gepleeg word nie.
Die beheerliggaam, onder voorsitterskap van Charl van Niekerk, het in die verklaring gesê hulle en die huidige hoof kan nie verantwoordelik gehou word vir wat voorheen gebeur het nie, maar hulle aanvaar die verantwoordelikheid om die probleem te probeer oplos.
Uit ’n voorlopige ondersoek oor probleme by die skool blyk dit dat stereotipering en leerlinge wat mekaar rassistiese name toesnou onder alle rassegroepe aan die orde van die dag is.
’n Program gaan nou in samewerking met die internasionale organisasie Youth Crime Watch opgestel word.
- Beeld