Ras-pot prut oor miljoen bruines
2011-02-21 07:02
Kaapstad - Riskant, onsensitief en malligheid wat die potensiaal het om rassespanning in die Wes-Kaap aan te vuur.
Só het bruin leiers gereageer op navorsing van die vakbond Solidariteit wat toon dat bykans ’n miljoen mense – oftewel 80% van alle ekonomies aktiewe bruin mense in die Wes-Kaap – hul werk kan verloor as die regering met wysigings aan arbeidswetgewing deurdruk.
Voorgestelde wysigings aan die Wet op Gelyke Indiensneming wat bepaal dat nasionale demografiese syfers vir werkplek-aanstellings gebruik moet word, dien tans voor die parlement.
Tans word provinsiale bevolkingsyfers gebruik, wat bruin mense in die Wes-Kaap bevoordeel omdat hulle die grootste bevolkingsgroep in die provinsie is.
Patricia de Lille, OD-leier, glo die voorgestelde wetgewing is ongrondwetlik en sal nie die toets van grondwetlikheid slaag nie.
“Die wetgewing is nog nie finaal nie. Dit hou egter in sy huidige vorm implikasies in vir bruin mense in die Wes-Kaap. My raad is dat dit in die parlement beveg moet word. Vir my is dit net ’n voorstel en ek hoop dat die regering tot sy sinne sal kom.”
Rhoda Kadalie, menseregte-aktivis, het gesê die gebruik van nasionale bevolkingsyfers vir aanstellings sal bruin mense benadeel. Ek ondersteun nie regstellende aksie nie, maar as jy dit moet doen, moet dit reg gedoen word. Om nasionale syfers te gebruik, is om die bruin meerderheid in die Wes-Kaap te ignoreer, en hulle uit te sluit wanneer dit by werksgeleenthede kom.”
Peter Marais, voormalige Wes-Kaapse premier, het gesê: “Die ANC het duidelik ’n perd opgesaal wat hy nie enduit sal kan ry nie. Boere sal bruin plaaswerkers met swart arbeiders moet vervang. Dieselfde sal in die klere- en boubedryf gebeur. Dit kan onmin tussen bruin en swart mense saai. Dit is malligheid.”
Danny Titus van die Bruin Belange Inisiatief, wat saam met Marais ’n versoekskrif teen dié wysings opgestel het, glo ’n direkte gesprek met die ANC is nou die eerste prioriteit.
Christo van der Rheede, hoof van die Stigting vir Bemagtiging deur Afrikaans, beskou die voorstelle as “absoluut onsinnig, ondemokraties en onsensitief”.
“Dit hou enorme implikasies in vir die Wes-Kaap. Dit kan tot groot spanning in die provinsie lei. Dit grens aan etnisiteit. Jy kan nie een stuk benadeling regstel met ’n ander nie.”
Dr. Franklin Sonn, oud-ambassadeur, het gesê daar is vele aspekte in die arbeidswetgewing wat klaarblyklik negatiewe gevolge vir nasiebou sal hê. “Daar is nou ruimte om ’n konstruktiewe gesprek met die regering daaroor te hê.”)Prof. Pierre de Vos, grondwetkenner aan die Universiteit van Kaapstad, meen ’n sterk argument kan gemaak word dat die konsepwetgewing ongrondwetlik is.
Hy meen egter dit is “sterk gestel” om te sê ’n miljoen bruin mense kan hul werk verloor. “Ingevolge die wet kan jy nie een groep afdank om die ander groep aan te stel nie. Teikens moet nagestreef word. As iemand dus aangestel of bevorder word en daar is ’n wanbalans, moet iemand uit die onderverteenwoordigde groep aangestel word.”
Volg Nuus24 op Twitter
- Die Burger