Ramphele stig dalk forum

2013-02-18 08:03

Johannesburg – Dr. Mamphela Ramphele, menseregtestryder, sal na verwagting Maandagoggend aankondig sy gaan ’n “konsultatiewe forum” stig om die opposisie teen die ANC te verenig, berig Beeld.

Ramphele spreek 11:00 ’n mediakonferensie in Johannesburg toe met die klaarblyklike doel om ’n soort “sambreelorganisasie” gegrond op sowat tientalle breë beginsels daar te stel sodat opposisiepartye in ’n enkele party kan verenig – onder haar leiding.

Sy het ’n geskiedenis as voorstander van die swartbewussynsideaal tydens die bevrydingstryd, is ’n voormalige rektor van die Universiteit van Kaapstad en leidende figuur by die Wêreldbank.

Sy het verskeie leidende Suid-Afrikaners na die mediakonferensie genooi. Verskeie bekende liberale genooides het die uitnodiging nie aanvaar nie, maar die verwagting is dat ander bekendes soos prof. Njabulo Ndebele (oudrektor van die Universiteit van Kaapstad) en Moeletsi Mbeki (politieke ontleder en broer van oudpres. Thabo Mbeki) dalk wel kan opdaag.

Die verwagting is dat Ramphele baie duidelik kan wees oor die breë beginsels wat sy onderskryf en baie skerp in haar kritiek op die ANC, maar baie vaag oor hoe sy haar planne prakties gaan uitvoer, veral wat die beplande stigting van 'n politieke party betref.

– Volg Nuus24 op Twitter