Ramphele se 'politieke planne' gou bekend
2013-02-12 08:12
Johannesburg – Dr. Mamphela Ramphele gaan haar “politieke planne” Maandag op ’n mediakonferensie in Johannesburg bekend maak, berig Beeld.
Ná maande van bespiegeling oor die moontlikheid dat dié akademikus en aktivis haar by die DA gaan aansluit of haar eie politieke party gaan stig, het die koerant Maandag ’n uitnodiging na die geleentheid ontvang.
Gerugte loop dik dat Ramphele en die DA nie ’n ooreenkoms kon bereik nie en sy nou haar eie party gaan stig.
Ramphele het verlede April gesê sy wil ’n “burgerregtebeweging vir maatskaplike verandering op die been bring, nié ’n politieke party nie”, maar intussen het sy glo tydens ’n besoek aan die VSA probeer om geld vir ’n politieke party in te samel.
Volgens politieke ontleders het dié apartheidstryder, dokter en voormalige besturende direkteur van die Wêreldbank oorgenoeg geloofwaardigheid en die regte beeld vir ’n suksesvolle politieke loopbaan.
Hulle is egter nie oortuig dat ’n nuwe politieke party die regte stap is nie. Volgens Theo Venter, politieke ontleder aan die Noordwes-Universiteit, is Ramphele “polities naïef”.
“Sy is ’n formidabele vrou en iemand wat werklik ’n bydrae gelewer het en kan lewer in die land, maar sy verstaan nie die werklikhede van politiek nie. Jy moet polities fiks wees.
– Volg Nuus24 op Twitter
- SAPA
