Ramphele en Sexwale pak ANC oor planne
2010-08-12 08:35
Johannesburg – Die media het nog ’n bondgenoot gekry in die vorm van die sakevrou dr. Mamphela Ramphele, wat gewaarsku het dat die statutêre beheer van die media nie die regering se probleme sal oplos nie.
“Waar is die sakelui wat hulle aansluit by Tokyo Sexwale om persvryheid te beskerm?” het Ramphele gevra by die Discovery Invest-leierskapberaad hier.
Sy het gesê die Wetsontwerp op die Beskerming van Inligting, wat dit moeilik vir joernaliste kan maak om staatsinligting te bekom en dit in die openbare belang te publiseer, is ’n “onuitwisbare herinnering” aan apartheid.
“Die wetsontwerp... en (media)tribunaal behoort alle landsburgers te laat wakker skrik uit die sluimering waarin ons klaarblyklik sedert 1994 is.”
Ramphele het gesê die gehalte van joernalistiek het agteruitgegaan weens ’n gebrek aan beleggings in opleiding en ’n vergoedingstelsel vir joernaliste.
“Politici wat bedreig voel, sal die swakpunte in die joernalistiek aanval... maar hulle moet nie dink dat beheer oor die media die land se probleme gaan oplos nie,” het sy gesê.
Vroeër het Sexwale by dieselfde geleentheid gesê dit sou ongrondwetlik wees om te probeer om die media “te vernietig en te beveg”.
Hy het gesê “’n warm debat” woed die laaste paar dae oor die media, in ’n klaarblyklike verwysing na die regerende ANC se voorstel om ’n mediatribunaal vir die gedrukte media op die been te bring.
Die voorstel word hewig deur onder meer die ANC-jeugliga ondersteun.
“Daar is ’n persepsie dat daar ietwat van ’n oorlog tussen... die ANC en die media is... Ek wil dit sonder enige dubbelsinnigheid stel dat daar nie enige grondigheid vir só ’n geveg behoort te wees nie.
“Dat die media beveg en vernietig moet word, sal ongrondwetlik wees. Dit druis in teen (oudpres. Nelson) Mandela se waardes en dit waarvoor ek geveg het,” het Sexwale te midde van luide applous gesê.
- SAPA