Ramphele: Ek praat vir myself
2013-01-29 17:04
Johannesburg – Die menseregtestryder dr. Mamphela Ramphele het Dinsdag gesê sy sal self 'n aankondiging maak indien sy 'n politieke party gaan stig.
"Ek was nog altyd duidelik in die artikulering van my sienings oor kwessies van openbare belang en sal vir myself praat oor enige besluite wat ek dalk oor my toekomstige verbintenisse sal neem," het sy in 'n verklaring gesê.
Sy het gesê sy "dra kennis" van berigte dat sy beplan om 'n politieke party te stig.
"Ek wil dit op rekord plaas dat ek gesprekke met Suid-Afrikaners uit alle vlakke van die lewe gevoer het oor die stand van demokrasie in Suid-Afrika.
"Dié gesprekke is in ooreenstemming met die nasionale dialoog wat ek deur my jongste boek, Conversations with my Sons and Daughters, wil bemark."
Rapport het Sondag berig Ramphele is vroeër vandeesmaand na Amerika waar sy aan minstens een gehoor gesê het sy samel geld in vir ’n “politieke party” en dat sy "nou die politiek gaan betree om haar land te red”. Sy het ook ambassadeurs om ondersteuning bearbei.
Tony Leon, voormalige DA-leier, het aan City Press gesê twee mense wat haar vergaderings in Amerika bygewoon het, het dit afsonderlik aan hom vertel.
Helen Zille, DA-leier, het verlede jaar probeer om Ramphele sover te kry om by die DA aan te sluit, maar Ramphele het gekies om haar eerder toe te spits op die Citizens’ Movement, ’n nie-regeringsorganisasie wat sy gestig het om maatskaplike verandering te versnel.
’n Bron het gesê Ramphele meen sterker optrede is nodig ná pres. Jacob Zuma se herverkiesing as ANC-leier.
– Volg Nuus24 op Twitter
- SAPA
