Raaiselagtige nota ná plaasmoorde gevind
2009-12-09 07:42
Tisha Steyn
Beaufort-Wes - ’n Nota wat geskryf is nadat ’n man drie mense koelbloedig op ’n plaas buite Beaufort-Wes afgemaai het, het gister die raaisel rondom die moorde laat verdiep.
Marthinus (Tiens) Esterhuizen (43) is Saterdagmiddag in hegtenis geneem in verband met die moorde op die volksanger Helena Nuwegeld (85) en Hendrik September (64), haar man, en Mistas John (38) op die plaas Nooitgedacht sowat 25 km buite Beaufort-Wes.
“Ek weet nie hoekom Tiens dit gedoen het nie,” het Gert van der Westhuizen, eienaar van die plaas en sakeman in die dorp, gister verslae gesê.
“Ek het ’n nota op die kombuistafel gekry wat sê: ‘ ’n Mens het nie geld nodig om in die hemel of in die hel te kom nie, maar jy kan ook nie sonder geld nie. Wat ek gedoen het, was my werk’. ”
“Hy het nie vir my gewerk nie. Hy het voorheen vir Transnet gewerk. Hy was nog nooit ’n boer nie. Hy het niks met my werkers te doen gehad nie. Hy het nie vir hulle opdragte gegee nie; niks.”
Volgens Van der Westhuizen het Esterhuizen die geld wat hy ná sy ontslag ontvang het op die internet weggedobbel. “Hy het sy huis, sy bakkie en sy motorfiets verloor. Nie een van sy ander vriende wou hom help nie en ek het hom jammer gekry.
“Ek het hom verniet hier laat bly en gesorg dat hy kos het.
“My goedhartigheid het in my gesig ontplof.”
David Kramer, wat Nuwegeld se talent as volksanger ontdek het, hanteer die reëlings vir die begrafnis. “David kom die naweek om alles te reël,” het Nuwegeld se dogter, me. Maria Nuwegeld, gesê. Hy sal ook vir die begrafnis betaal.
Esterhuizen het gister weer vlugtig in die landdroshof hier verskyn. Die saak is in die afwesigheid van sy regsverteenwoordiger tot volgende Dinsdag uitgestel.
- Die Burger