Raaisel oor erg verminkte babalykie
2010-08-10 09:23
Volksblad
Welkom - ’n Raaisel omhul die grusame ontdekking van ’n babalykie, halfpad deur honde opgevreet, wat Maandag in die agterplaas van ’n huis in die woonbuurt Thabong gekry is.
Hoewel die polisie ’n klag van verberging van geboorte ondersoek, het paramedici op die toneel gesê die baba was moontlik nie pasgebore nie. As na die grote daarvan en die vorming van die skedel gekyk word, was die kind dalk reeds minstens vier maande oud.
Net die bolyf met linkerarm en kop van die baba was oor nadat die res waarskynlik deur die basterhonde in die erf opgevreet is.
David Motalingoane, die huurder van ’n hut in die agterplaas van die huis in Modikengstraat 3324, Thabong, sê hy het iets teen die huis se muur sien lê en eers nie besef dat dit ’n lykie is nie. Toe hy naderstap, het hy tot sy skok besef wat dit is.
Hy het die polisie ontbied, wat weer met die ambulansdiens in verbinding getree het.
Ao. Malebo Khosana, polisiewoordvoerder, het by navraag gesê polisiebeamptes wat na die huis ontbied is, het ’n saakdossier van verberging van geboorte, wat beteken dié van ’n pasgebore baba, geopen.
Hy sê hulle vermoed dat die lykie Sondagnag iewers in die omgewing, waar dit moontlik deur die ma gelaat is, deur die honde gekry en huis toe gesleep is.
Hy sê die feit dat daar Maandag nie ’n teken van gate in die hoë heining was nie, beteken dit nie dat die honde wel uit die erf kon kom nie.
Met Volksblad se aankoms Maandag by die huis het omstanders ’n basterhond, wat in die son langs die huis gelê het en nooit vasgemaak word nie, uitgewys as die een wat moontlik die lykie daar aangebring het. In die erf was ook ’n groter hond wat aan ’n ketting vasgemaak staan, en drie jong hondjies wat naby die grote gespeel het.
’n Lykskouing vandeesweek sal wys presies hoe oud die baba was toe hy of sy dood is.
Khosana sê die polisie het nog geen idee wie die ma is nie en vra dat enigiemand met inligting wat hulle in die ondersoek kan help, om die plaaslike eenheid teen gesinsgeweld en seksuele oortredings, of met die naaste polisiekantoor in verbinding te tree.
- Volksblad