Raaisel omhul moord op onnie
2012-01-03 10:48
Welkom – ’n Raaisel omhul die moord op ’n Welkomse onderwyser wie se lyk Saterdagoggend in sy huis in die woonbuurt Riebeeckstad hier gekry is.
Net ’n goedkoop DVD-speler is uit die huis van Ngwane Maxwell Hlatshwayo (50) in Mozartstraat 89 weg. Sy ringe en ander juwele het op die spieëlkas gelê langs die bed waarin hy vermoor is.
Die is die tweede moord op ’n onderwyser in dié woonbuurt binne agt maande.
Niemand is ook nog weens die moord op Piet van den Heever (65), oud-adjunkhoof en bekende provinsiale rugbyskeidsregter, in hegtenis geneem nie.
Van den Heever is in Februarie 2010 in sy bed in Wedepohlstraat 19, Riebeeckstad, waar hy gelê en koerant lees het, met skerp voorwerpe vermoor.
Hlatshwayo se vrou, Partia, en hul drie seuns, Thokozane, Nolumisa en Nhloso, bly op Ermelo waar sy werk.
Hlatshwayo was ’n onderwyser aan die Laerskool Reitzpark in Welkom.
Hy het sy onderwysloopbaan in 1986 begin en is in 1989 getroud.
Sy vrou en die polisie vermoed hy was Vrydagaand na ’n formele geselligheid, want hy het netjiese klere aangehad voordat hy vermoor is.
Hulle vermoed hy het iemand by die geselligheid ontmoet en die mens of mense is saam met hom na sy huis, waar hy in sy bed oorval en vermoor is.
Kapt. Stephen Thakeng, polisiewoordvoerder, sê Hlatshwayo se lyk is Saterdagoggend deur sy huishulp gekry.
Sy mond was toegebind en lakens was om sy kop gedraai. Sy hande en voete was voor sy lyf vasgebind, en daar was snywonde aan sy kop. Hy is vermoedelik verwurg.
Volg Nuus24 op Twitter
- Volksblad